Franca ka mirëpritur vendimin e pranimit të propozimit evropian për marrëveshjen bazë me qëllim të normalizimit të marrëdhënieve mes Kosovës dhe Serbisë.
Ministria e Punëve të Jashtme të Francës, ka thënë se Franca e mirëpret këtë vendim të guximshëm për të dyja vendet, si dhe pret që të zbatohen marrëveshjet e lidhura në kuadër të dialogut, duke përfshirë edhe Asociacionin. Këto marrëveshje, Franca, thotë se duhet të zbatohen pa vonesa, raporton teve1.info.
“Franca e mirëpret këtë vendim të guximshëm të dy vendeve. Tani pret që Serbia dhe Kosova të angazhohen pa rezerva dhe me të njëjtën frymë kompromisi në zbatimin e kësaj marrëveshjeje thelbësore për stabilitetin e Ballkanit Perëndimor. Ai gjithashtu rikujton se të gjitha marrëveshjet tashmë të lidhura në kuadër të Dialogut të lehtësuar nga Bashkimi Evropian duhet të zbatohen pa vonesë, duke përfshirë dispozitat që kanë të bëjnë me Asociacionin/Bashkësinë e komunave me shumicë serbe”, thuhet në reagim.
Ndryshe, njoftohet se Franca mbetet e plotësisht e mobilizuar, në mbështetje të ndërmjetësimit evropian për finalizimin e marrëdhënieve Kosovë-Serbi.
“Franca mbetet plotësisht e mobilizuar, në mbështetje të ndërmjetësimit evropian, për të arritur përparim të shpejtë me synimin për normalizimin e marrëdhënieve ndërmjet Serbisë dhe Kosovës”, thuhet në fund të njoftimit.
Dje në Bruksel, kryeministri i Kosovës, Albin Kurti dhe presidenti i Serbisë, Aleksandar Vuçiq, me ndërmjetësimin e përfaqësuesit të Lartë të Bashkimit Evropian, Josep Borrell dhe emisarit, Miroslav Lajçak, të dyja palët arritën një marrëveshje në parim për propozimin evropian për një marrëveshje me synimin e normalizimit të marrëdhënieve mes të dyja vendeve.
