Profesori i shkencave politike, Dritëro Arifi vlerëson se rrethanat gjeopolitike janë të tilla që po e pamundësojnë Kosovën të merr njohjen ligjërisht të obligueshme.
Sipas Arifit njohja nga Serbia nuk po vjen pasi kështu e kanë përcaktuar fuqitë e mëdha.
“Rrethanat gjeopolitike nuk po na lejojnë që ne të marrim menjëherë njohjen ligjërisht të obligueshme për shkak se fuqitë e mëdha ende nuk e kanë vendos një gjë të tillë. Nuk varet nga të dyja palët, shumë gjëra nuk varen. Vijat e trasha i bëjnë të tjerët, sepse të tjerët po e paguajnë koston edhe të luftës apo keqkuptimit dhe zvarritjes së të gjithë problemit Kosovë – Serbi. Për shkak se duhet investim, kujdes më i madh. Dihet ku është problemi, është te fqinji verior, pra nuk është te ne por perëndimi po do me e nda influencën ruse në Serbi, dhe kjo është vështirë të bëhet me një prerje cezariane”, ka thënë ai te Ditari në Tëvë 1.
Sipas Arifit, propozimi evropian duhet të analizohet në detaje sepse aty fshihet “djalli”.
“Mendoj kryeministri e ka një obligim shtetëror kushtetues që duhet me analizu, sepse djalli është në detaje, jo në marrëveshje në ato pika që kemi pa. Detajet si duhet të formohet kjo apo ajo atëherë duhet ekspertiza më e thellë. Plani është përditësim i Marrëveshjeve të Brukselit dhe asaj të Washingtonit më 2020. Për herë të parë kemi terme universale të shtetësisë, kur pikat e potencojnë shtetësinë e vendeve, pra ajo që duhet pranuar flamuret, simbolet. Pra, Serbia de fakto po e pranon Kosovën si realitet, por me njëfarë forme butësisht dhe ligjërisht po e pranon edhe pavarësinë e Kosovës. Mendoj se Kosovës përmes kësaj marrëveshje po i hapen rrugët për integrimin euroatlantik”, ka shtuar Arifi.