Deputeti i PDK-së, Hisen Berisha ka thënë se me propozimin franko-gjerman do të bëhet një Asociacion tjetër nga ai që ishte planifikuar.
“Ajo që kisha parashikuar është se kryeministri Kurti është ai që do ta bëjë Asociacionin dhe do ta pranojë edhe një marrëveshje tash sipas planit franko-gjerman që është larg me atë që ishte marrëveshja e zotimeve të Washingtonit dhe larg atij Asociacioni që ishte planifikuar”, ka thënë Berisha.
Sipas tij kryeministri Kurti ka propaganduar me faktin se e ka cilësuar planin franko-gjerman si bazë të mirë për diskutime të mëtejme.
“Kryeministri para nisjes ka zhvilluar këtë propagandë mashtruese duke i promovuar 10 parimet e planit franko-gjerman, gjoja si bazë e mirë për zhvillim të dialogut më tutje. Në fakt këtë plan kryeministri po e përdor si çarçafi i David Cooperfieldit për të mbuluar krijimin e Asociacionit apo tash që është me një status të një autonomie territoriale politike dhe shumë e dëmshme për rendin kushtetues dhe juridik të Kosovës”, ka shtuar ai për emisionin Ditari në Tëvë 1.
Sipas Berishës propozimi franko-gjerman sjell tri detyrime të rrezikshme. Sipas tij njëra është që Asociacioni do të krijohet në bazë të një ujdie mes BE-së dhe Serbisë.
“Kryeministri do të pajtohet për një marrëveshje që do të sjellë tri detyrime të rrezikshme për integritetin, sovranitetin dhe perspektivën zhvillimore: 1. Asociacioni do të krijohet por jo në bazë të marrëveshjeve të 2013 a 2015, as të kalimit nëpër filtër të Kushtetueses por mbi një marrëveshje që do të negociohet mes BE-së dhe Serbisë ku BE-ja do të jetë arbitër i kësaj marrëveshjeje, 2. Do të pranojë tjetërsimin e statusit të Kishës Ortodokse, pra tehuajsimin e trashëgimisë ortodokse duke i dhënë status ekstraterritoraliteti apo shtetëror, duke e mbivendosur mbi sovranitetin territorial të Kosovës dhe 3. Kosova dhe Serbia do të ndajnë pushtetin për komunat që do të përfshihen në kuadër të Asociacionit dhe objektet religjioze fetare, Patrikana e Pejës e Deçanit etj e që e kapin një pjesë të madhe të territorit e që e shndërrojnë Kosovën në pamje të lëkurës së Leopardit”, ka shtuar ai.
