SC Gjilanit ka reaguar në lidhje me arrestimin e sulmuesit të tyre, Theophilus Solomon nga Policia e Kosovës.
Të premten, Solomon u arrestua nga autoritetet e rendit, teksa më pas iu caktua masa e paraburgimit, me dyshimin për dhunim, derisa sipas kuqebardhëve ka të bëjë me një ngjarje viteve me parë, sa ishte pjesë e Superiores.
“Sport Club Gjilani përmes kësaj komunikate dëshiron të njoftojë opinionin në lidhje me situatën e krijuar me futbollistin e ekipit tonë, Theophilus Solomon. Futbollisti me origjinë nga Nigeria të premten është shoqëruar nga policia për shkak të një rasti personal që ka patur më herët, teksa ishte pjesë e kampionatit shqiptar pak vite më parë”, thuhet nder tjera në njoftimin e SC Gjilani.
Te Gjilani janë të gatshëm të bashkëpunojnë maksimalisht me autoritetet relevante deri në sqarimin dhe pastrimin e plotë të këtij rasti, edhe pse nuk janë në dijeni me kohën dhe vendin e ngjarjes se ku ka ndodhur.
“Sport Club Gjilani gjithmonë ka treguar kujdes gjatë angazhimit të lojtarëve të ri, kur paralel me cilësitë futbollistike vëmendje i kemi kushtuar edhe anës njerëzore. Njejtë edhe me futbollistin Theophilus Solomon, i cili ka treguar sjellje tejet korrekte dhe ka qenë shembull për të tjerët në shumë raste. Ne si klub ofrojmë bashkëpunim sa i përket pjesës tonë të kompetencave edhe pse realisht nuk kemi asnjë lidhje me kohën dhe vendin ku ka ndodhur ngjarja”, thuhet në njoftimin e Gjilanit.
Derisa, Gjilani nuk do të bëjë një koment tjetër, deri në vendimin përfundimtar nga autoritetet kompetente.