Delegacioni shqiptarë i Luginës së Preshevës, ka arritur në Shtetet e Bashkuara të Amerikës, ku edhe do t’i drejtohen Senatit Amerikan, për të folur për gjendjen e shqiptarëve në Luginën e Preshevës.
Deputeti në Parlamentin e Serbisë, Shaip Kamberi, bashkë Ardita Sinanin e Ragmi Mustafin, Flora Feratin, Nagip Arifin e Ragmi Mustafën, janë pjesë e këtij delegacioni.
Kamberi ka thënë se nuk do të ndalen për të kërkuar të drejta të plota e mundësi të barabarta.
“Përpjekjet tona për realizimin e të drejtave të plota dhe krijimin e mundësive të barabarta për të gjithë, përveç që janë beteja politike të përbashkëta, janë edhe kërkesë e nevojë e përditshme e çdo qytetari shqiptar në Luginë të Preshevës. E përpjekja është obligim i yni. Në vend dhe jashtë vendit. Prandaj nuk duhet të lodhemi e aq më pak të heqim dorë”, ka shkruar ai.
Ai ka thënë se pas përfundimit të luftës së UÇPMB-së, kanë nënshkruar tri marrëveshje me qeveritë në Beograd, por të cilat nuk janë realizuar.
Sipas tij, ka edhe nga vendorët që tentojnë të bllokojnë ç’do koordinim.
Në vend të zgjidhjes së problemeve e realizimit të kërkesave tona legjitime, faktorë të ndryshëm vendorë, me vite me radhë, mundohen të bllokojnë çdo koordinim tonin të përbashkët, çdo iniciativë të shndoshë e çdo tentativë për t’i siguruar jetë më të mirë të qytetarëve tonë.
“Prandaj, sot më shumë se kurrë kemi nevojë për koordinim të brendshëm e bashkëpunim të afërt me Prishtinën e Tiranën. Harmonizim të politikave tona me miqtë tanë ndërkombëtar e sensibilizim të
çështjes së shqiptarëve të Luginës. Për këtë do të jemi në Washington e me këtë nuk do të përfundojmë angazhimin tonë. Faza e re në të cilën po hyn çështja e pakicave në Ballkan është mundësi e mirë për trajtimin simetrik të pozitave të tyre gjithandej”, ka shkruar Kamberi.
Ai ka falënderuar Qeverinë e Kosovës që ka mbuluar shpenzimet për këtë udhëtim dhe Ligën Qytetare Shqiptaro-Amerikane për përkushtimin e parezervë për kauzën tonë të drejtë tash e dy dekada.
Qeveria e Kosovës ditë më parë ka ndarë 39,470.21 dollarë amerikan për vizitën e tyre në SHBA.
