Unioni i Shqiptarëve në Kroaci, ka bërë të ditur se në bashkëpunim me Ambasadën e Shqipërisë, po e përcjellin nga afër gjendjen e aksidentit, në të cilin një autobus me targa shqiptare është përmbysur, ku si pasojë la të vdekur një person dhe disa të tjerë të lënduar.
Përmes një njoftimi në Facebook, njoftohet se UShK, po qëndron afër personave të lënduar nëpër spitale, si dhe janë në dispozicion të të lënduarve.
Gjithashtu, UShK ka publikuar identitetet e disa prej të lënduarve, raporton teve1.info
“Unioni Shqiptar në Kroaci, Bashkësia Shqiptare e Prefekturës së Karlovacit, Shoqata e Luftëtarëve Shqiptarë të Luftës atdhetare në bashkëpunim me Ambasadën e Republikës së Shqipërisë po e përcjellin ngjarjen prej afër, po gjinden pranë personave të lënduar nëpër spitale dhe janë në dispozicion të të lënduarve në çdo moment”, thuhet në njoftim.
Gjithashtu, është bërë e ditur se personat e lënduar po trajtohen në spitalet e përgjithshme në Karlovac dhe Ogulin.
Aksidenti i rëndë, ka ndodhur në autostradën A1 ndërmjet kryqëzimit Brinje dhe kryqëzimit Ogulin në drejtim të Zagrebit.
