Kryeministri i Kosovës, Albin Kurti, ka zhvilluar sot një bisedë telefonike me Këshilltarin e lartë të Departamentit amerikan të Shtetit, Derek Chollet, si vazhdimësi e mirëmbajtjes së një komunikimi të rregullt, veçanërisht tani në prag të takimit të së hënës në Bruksel.
Në njoftimin për media të Qeverisë thuhet se gjatë kësaj bisede, kryeministri konfirmoi qëndrimin e tij për propozimin evropian “si bazë të mirë për bisedimet e mëtutjeshme drejt normalizimit të marrëdhënieve”.
“Për marrëdhënie normale, evropiane e të fqinjësisë së mirë, Kryeministri Kurti theksoi që përveç njohjes reciproke në qendër të marrëveshjes, duhet t’i konsiderojmë edhe të drejtat e pakicave kombëtare. Kryeministri falënderoi z. Chollet për mbështetjen përgjatë procesit të dialogut dhe vëmendjen e vazhdueshme të Shteteve të Bashkuara të Amerikës, e posaçërisht të z. Chollet personalisht”, thuhet në njoftimin e Qeverisë.
Gjatë kësaj bisede, Chollet u njoftua nga kryeministri Kurti që sot në Kosovë, bashkë me 12 gazetarët ukrainas është shënuar njëvjetorin e agresionit duke përkujtuar viktimat por edhe luftën e drejtë çlirimtare të popullit ukrainas.
