Drejtori ekzekutiv i Qendrës për Informim dhe Përmirësim Social (QIPS), Bind Skeja ka dhënë detaje rreth aksionit simbolik të tyre sot para hyrjes së repartit të Logopedisë në SHSKUK për të kundërshtuar kthimin në punë të logopedit, Iljasa Fazliut.
Në një lidhje direkte në “Ditari” në Tëvë 1, Skeja deklaroi se Klinika e Logopedisë nuk është e sigurt dhe se në të njëjtën kohë, fëmijët janë në rrezik për keqtrajtim.
Ai bëri të ditur se fakti që ende nuk kanë marrë një përgjigje nga Drejtoria e SHSKUK-së i ka shtyrë ata ta mbajnë aksionin simbolik.
“Aq shumë ka shkelje që nuk ka nevojë me zhagit këtë proces e veç me largu prej punës. Fakti që SHSKUK ka dështu në këtë sen, thjesht kanë treguar sa i dobët është si institucion i cili një keqbërës të tillë nuk o kah do me largu”, potencoi ai.
Sipas tij, është “marre” që kjo gjë e tillë ende diskutohet.
Skeja shtoi se derisa logopedi Fazliu do të punojë, QIPS do të vazhdojë të dërgojnë ankesa e të bëjnë rezistencë.
Logopedi, Iljasa Fazliu ishte arrestuar nën dyshimin për abuzim me një fëmijë. Për këtë rast, ai ishte pezulluar nga Komisioni Disiplinor deri në vendimin për rikthim në punë. /Teve1.info/
