Mbretëria e Bashkuar mirëpret përkushtimin e kryeministrit, Albin Kurti në propozimin e dialogut që do të diskutohet në takimin e nivelit të lartë të hënën më 27 shkurt.
Kështu ka bërë të ditur ambasadori britanik në Kosovë, Nicholas Abbott, përcjell teve1.info
Ai po ashtu ka thënë se janë krenarë për mbështetjen e Kosovës ndaj Ukrainës.
“Në përvjetorin e parë të pushtimit ilegal të Ukrainës nga Rusia, është e rëndësishme që të bëhen të gjitha përpjekjet për të ruajtur paqen, stabilitetin dhe sigurinë në Evropë. Ne jemi krenarë për mbështetjen e pakushtëzuar të Kosovës për popullin ukrainas, kjo është një shenjë e qartë e vlerave demokratike të Kosovës”, ka shkruar ai në Facebook.
Sipas tij, Kosova ka një rol të rëndësishëm për të luajtur duke u angazhuar në mënyrë konstruktive dhe duke bërë kompromiset e nevojshme që i mundësojnë shtetit dhe qytetarëve të saj të përparojnë.
“Është po aq e rëndësishme të sigurohet një mjedis i sigurt që krijon hapësirën për një marrëveshje të qëndrueshme dhe normalizimin e marrëdhënieve. Më 17 shkurt, si aleat i palëkundur, iu bashkuam Kosovës në festimin e 15 vjetorit të pavarësisë. 15 vjet pas pavarësisë, Kosova ka mundësinë të bëjë progres në integrimin ndërkombëtar, zhvillimin ekonomik dhe ndërtimin e një shteti të begatë. Negociatat e suksesshme do ta krijojnë atë të ardhme”, është shprehur ai. /Teve1.info/
