Ministri i Jashtëm i Serbisë, Ivica Daçiq ka thënë se Serbia nuk mund të negociojë propozime të reja përderisa nuk formohet Asociacioni i Komunave me Shumicë Serbe.
“Me përshkallëzimin e situatës në Ukrainë, fokusi i komunitetit ndërkombëtar në përpjekjet për të zgjidhur çështjen e statusit të provincës sonë jugore është rritur. Prandaj, dhe falë një politike të mençur, ne kemi formuar një pozicion të qartë dhe të vendosur negociues, sipas të cilit nuk mund të ketë negociata për asnjë propozim të ri derisa të formohet Bashkësia e Komunave Serbe. Ju e keni të qartë se raundi i ardhshëm i bisedimeve në Bruksel ka një peshë të veçantë, sepse ne duam të mbetemi këmbëngulës në mbrojtjen e interesave tona kombëtare, në radhë të parë për të mbrojtur popullin tonë dhe identitetin kulturor e fetar”, tha Daçiq, shkruan Kosovo Online.
Daçiq theksoi se Serbia ende beson se anëtarësimi i plotë në BE është i arritshëm.
“Prandaj, përmbushja e kritereve në rrugën drejt anëtarësimit të plotë mbetet një nga prioritetet kryesore të politikës së jashtme, që është edhe synimi strategjik i të gjitha qeverive serbe në 20 vitet e fundit. Mesazhi ynë i vazhdueshëm dhe i përsëritur vazhdimisht është se reforma e BE-së duhet të jetë paralele me procesin e zgjerimit. Ne po përpiqemi të bindim vendimmarrësit kryesorë brenda BE-së se këto procese nuk janë kundër me njëra-tjetrën, por plotësuese. Megjithatë, ju jeni të vetëdijshëm se në rrugën tonë evropiane ka sfida të shumta, në radhë të parë sepse anëtarësimi i plotë mbetet një “objektiv në lëvizje” me kërkesa që po ndërlikohen dhe shumëfishohen, dhe të cilat në këtë moment janë veçanërisht të rënduara nga nevoja e harmonizimit me Politikën e Përbashkët të Jashtme dhe të Sigurisë të Bashkimit Evropian”, deklaroi ai, transmeton teve1.info.