Venera Qerkini është emëruar Drejtor Ekzekutiv në Agjencinë për Zhvillimin e Bujqësisë, në mbledhjen e sotme të Qeverisë.
Megjithatë në vlerësimin që kishin bërë ekspertët e Ambasadës së Britanisë së Madhe në Kosovë, të cilët kishin monitoruar procesin e rekrutimit, Qerkini nuk ishte kandidati më i vlerësuar.
Komisioni në përbërje me Naim Gashin, Edi Gusian, Bedri Xhafën, Safet Fazliun dhe Anita Kalanderin, i kishin vlerësuar dy kandidatë të tjerë me më shumë pikë.
Kandidati Menderes Ibra kishte marrë 70.25 pikë teksa Muzafer Luma 70 sosh.
E ky i pari ishte vlerësuar edhe nga Komisioni Shtetëror i Pranimit dhe ishte futur në listën e ngushtë prej tre personash që ishin kandidatë për Drejtor Ekzekutiv në Agjencinë për Zhvillimin e Bujqësisë. Megjithatë, sipas ministrit të Brendshëm Xhelal Sveçla, ishte ministri i Bujqësisë Faton Peci që kishte propozuar emërimin e Qerkinit.
“Në pajtim me dispozitat ligjore, MpB ka zhvilluar procedurën e rekrutimit me qëllim të plotësimit të vendit të lirë të punës. Për pozitën drejtor ekzekutiv kanë aplikuar 15 kandidatë, 9 prej të cilëve kanë hyrë në listë të ngushtë. Pas vlerësimit profesional nga Komisioni Shtetëror i Pranimit, kandidatët, kandidatët fitues që janë vlerësuar me mbi 70 % të pikëve janë Venera Qerkini, Menderes Ibra dhe Lebibe Haliti. Në pajtim me dispozitat ligjore dhe pas përzgjedhjes nga ministri i Bujqësisë në cilësinë e mbikëqyrësit të drejtpërdrejtë, propozoi emërimin e Venera Qerkinit si drejtore për një mandat 4-vjeçar”, tha sot Sveçla në mbledhjen e Qeverisë
