Arsenali është ende lider në Premier Ligën angleze, mirëpo gara vazhdon të mbetet mjaft e nxehtë pasi Manchester City e United janë po ashtu në ndjekje të tyre.
Megjithatë, gunners pa përfunduar ky sezon kanë filluar të mendojnë për përforcimin e skuadrës në afatin e verës. Ata po planifikojnë një plan afatgjatë dhe kanë kthyer sytë kah mesfushori i West Ham, Declan Rice, me anglezin që po kalon muajt e fundit në London Stadium.
Mesfushori Rice do të largohet nga West Ham Unitedi për ta vazhduar karrierën te skuadra e Arsenalit. “Daily Mail” ka raportuar të martën se Rice ka arritur marrëveshje personale me Arsenalin, ekip që po negocion me drejtuesit e Hammers për lirimin e tij në verë.
Mësohet se Arsenali i ka ofruar anlgezit kontratë pesëvjeçare me pagë javore prej 200 mijë funtesh për ta bindur që të refuzojë ofertat e skuadrave tjera, me Mikel Artetan që e sheh atë si zëvendësues të ganezit Thomas Partey, pasi ky i fundit po përballet me lëndime të shumta.
Megjithatë, West Hami për ta lënë të lirë kapitenin po kërkon të paktën 100 milionë euro.
Rice është njëri prej lojtarëve më të kërkuar në Angli, pasi interesim për të kanë treguar edhe Manchester Unitedi e Chelsea. 24-vjeçari ka kontratë me West Hamin deri në vitin 2025, ndërsa këtë edicion në 28 paraqitje ka shënuar 1 gol dhe ka bërë 2 asistime.
