Sot, në Bibliotekën Kombëtare të Kosovës “Pjetër Bogdani” për nder të 15 vjetorit te pavarësisë së Kosovës, u hap ekspozita e përbashkët e punimeve artistike të nxënësve nga Kosova dhe Shqipëria. Aty u ekspozuan mbi 107 punime, secila e veçantë në vete.
Ministrja e Arsimit, Shkencës, Teknologjisë dhe Inovacionit, Arbërie Nagavci, tha se është kënaqësi që sot i mblodhi arti i nxënësve shqiptar nga dy anët e kufirit.
“Është kënaqësi që sot na ka mbledhur arti dhe punimet artistike të nxënësve nga dy anët e kufirit shqiptar, në këtë ekspozitë me rastin e 15 vjetorit të pavarësisë së Kosovës duke i dhënë kësaj ngjarje historike edhe këndvështrimit artistik nga ana e nxënësve dhe shkollave… Ky brez i nxënësve të gjithë ju djemë dhe vajza që jeni sot këtu të lindur pas shpalljes së pavarësisë jeni me fat që po rriteni në liri dhe sot kjo rini janë në Kosovën e pavarur ashtu siç e duam dhe do ta bëjmë ashtu siç kontribuan me dekada të tëra, fëmijët tanë e meritojnë”, tha Nagavci.
Përfaqësuesi nga Shqipëria, Hasan Huqaj, drejtor i drejtorisë rajonale të arsimit parauniversitar të qytetit të Lezhës, tha se janë shumë krenarë për punën e jashtëzakonshme të nxënësve.
“Keni bërë vizatime në të cilën shpalosni mendjen e hapur nga njëra anë dhe gjithçka e keni punuar me duart e arta për një dashuri jashtëzakonisht të madhe. Në vizatimet e juaja ndihet aroma e lirisë, në ngjyrat e tyre ndihet krenaria dhe ju përçoni mesazhin, është bukur të tonifikojmë elementet të krenarisë tonë, heroin tonë Skënderbeun, i cili ndër shekuj na ka bashkuar shpirtin me madhërishëm dhe human të Nënë Terezës dhe figurën më të mrekullueshme të luftëtareve të Ushtrisë Çlirimtare të Kosovës”, tha Huqaj.
Nxënësja kosovare, Elsa Berisha, nga shkolla SH.F.M “Asdreni”, e cila në eskpozitë mori pjesë me pikturën “Zogjtë në kafaz”, ku pasqyron Kosovën të lirë nga robërimi, tha se për ta kjo ekspozitë është e rëndësishme.
“Si mua ashtu edhe të gjithëve është e rëndësishme kjo ekspozitë sepse i kemi vendosur punimet tona dhe mundin tonë dhe vizatimet qe i kemi paraqitë. Dhe kjo ka shumë rëndësi sepse tregon dashurinë që kemi ne nxënësit dhe të tjerët që e vizitojnë Kosovë”, tha ajo.
Në këtë ekspozitë, pjesëmarrëse ishte edhe nxënësja nga Shqipëria, Rrezarta Gjeleshi, nga gjimnazi “Fiqiri Dine”, Maqellarë, Dibër, në ekspozitë mori pjesë me pikturën “Ta mbrojmë plisin, heeeeej. I kujt është ky plis more?”. Ajo u shpreh se do të donte që piktura e saj të hynte në UNESCO.
“Unë jam shumë e lumtur që jam këtu, dhe u bëra pjesë e këtij konkursi fantastik dhe jam shumë krenare me vetën për pikturën që realizova sot… Unë doja të shfaqja talentin tim që pa punuar fortë, nuk mund të arrijmë asgjë dhe duhet të punojmë fortë atë që dëshirojmë…Piktura ime doja që plisi ashtu si xhubleta të bëhet pjesë e UNESCO dhe të bëhet sa më i famshëm”, tha ajo.
Interesimi për këtë ekspozitë ishte mjaft i madh. Ekspozita do të qëndrojë e hapur deri më 15 mars.
