Nuk ndryshon asgjë të ndeshja e xhiros së 19 të Superligës së Kosovës në futboll, mes Dukagjinit e Prishtinës. Komisioni i Garave e ka hedhur poshtë ankesën e Prishtinës, duke e referuar si të pabazuar. Komisioni i Garave e ka regjistruar ndeshjen e 12 shkurtit me rezultatin e arritur në fushë 1:0 për Dukagjinin.
“Prandaj, sipas nenit 79 të Rregullores së Garave refuzohet ankesa e FC Prishtina si e pabazuar dhe ndeshja e javës së 19-të ndërmjet KF Dukagjini – FC Prishtina, regjistrohet me rezultat të arritur në fushë 1:0 në favor të KF Dukagjini”, thuhet në vendimin e FFK-së.
Ekipi kryeqytetas ishte ankuar në golin e vetëm që vulosi epilogun përfundimtar të takimit, duke aloduar se gjyqtari me gabimin e bërë ka shkelur edhe rregullat e futbollit, derisa përmes një komunikate të hedhur në rrjetin e tyre sociale kishte kishte kërkuar përsëritjen e takimit.
Megjithatë, Komisioni i Garave përveç se e ka refuzuar si të pabazë ankesën e Prishtinës, dhe ka nënvizuar se sipas Rregullores së Garave, rasti në fjalë nuk mund të cilësohet i shkelje esenciale.
“Refuzohet si e pabazuar ankesa e FC Prishtina – nga Prishtina dhe ndeshja e javës së 19-të të Albi Mall Superligës së Kosovës, ndërmjet KF Dukagjini dhe FC Prishtina, regjistrohet me rezultatin e arritur në fushë, 1:0 në favor të KF Dukagjini nga Klina. Po ashtu Komisioni i Garave ka kërkuar Letërkonfirmimin edhe nga Komisioni vleresues i Gjyqtarëve dhe pas administrimit të gjitha shkresave një nga një si dhe të gjitha së bashku, e të cilat dëshmi kanë peshë dhe relevancë determinuese – përcaktuese në orientim dhe kahje të vendimmarrjes, kështu që sipas nenit 79 të Rregullores së Garave kemi shtatë (7) pika (raste) të shkeljeve esenciale të dispozitave të Rregullave të Lojës së Futbollit dhe rasti konkret, kontestues i kësaj ndeshje nuk mund të cilësohet (kualifikohet ) si shkelje esenciale”, thuhet tutjet në vendimin e FFK-së.