Dukagjini ka shënuar një fitore të rëndësishme që në hapje të sezonit të dytë në Superligë, derisa në xhiron e 19 ka shënuar fitore me shifra 1:0 ndaj Prishtinës në stadiumin “18 Qershori”, e cila solli mjaft tensione brenda fushës.
Një gol mjaft diskutabil erdhi në minutën e 42-të, gjë që bëri të sjellë edhe tensione brenda fushës. Mërgim Pefqeli ishte ai që ka shënuar autogol në minutën e 42-të. Pefqeli dërgoi topin në rrjetën e tij me një devijim, pas një goditje nga këndi. Por goli ishte shumë i dyshimtë.
Ende pa shkuar topi te Pefqeli, është dukur që arbitri Mentor Ajeti ka dhënë shenjë për faul në zonën e Prishtinës dhe ka bërë me dorë në drejtim të portës së Dukagjinit. Por pas rishikimit të situatës në VAR, Ajeti ka pranuar golin. Kanë pasur protesta të shumta të Prishtinës, ndërsa më pas loja ishte shumë e tensionuar. Protesta ka pasur edhe pas fundit të pjesës së parë.
Pjesa e dytë ishte me dominuese nga ekipi bardhekaltër, por pa arritur të dërgonin topin në rrjetë. Me këtë fitore Dukagjini ka shkuar në kuotën e 25 pikëve në vendin e pestë, derisa Prishtina është në pozitën e katër me 27 sosh.
Në ndeshjen tjetër mes Trepçës ’89 dhe Dritës e zhvilluar në stadiumin “Riza Lushta”, i ka takuar skuadrës së ’89-shit me rezultat minimal 1:0.
Golin e vetëm në këtë ballafaqim e realizoi Armend Gashi në minutën e 12-të të ndeshjes. Me këtë fitore, Trepça ’89 ngjitet në tabelë në vendin e shtatë dhe tani ka 22 pikë, dy më shumë se Drenica e vendit të tetë, zonës së plejautit.
Drita që pësoi disfatën e parë me trajnerin Arsim Thaqi në nisje të stinorit pranveror, mbetet me 38 pikë, tri më pak se Ballkani lider. Në xhiron e 20-të, Trepça ’89 luan në udhëtim te Llapi, kurse Drita në shtëpi e pret Dukagjinin.
