Studiuesi shqiptar në Turqi, Ekrem Zajmi ka folur për gjendjen pas tërmeteve në shtetin turk. Ai tha se ka një numër të madh të shteteve që kanë shprehur gatishmëri për ndihmë, përfshirë edhe Kosovën.
Zajmi në një lidhje direkte në Tëvë1, tha se ndihen krenar me punën e trupave të Forcës së Sigurisë së Kosovës që po bëjnë në Turqi, teksa theksoi se po përmenden në media për ngjarjen e dy vjeçares.
“Gjithmonë ndihma e jashtme është e jashtëzakonshme. Ka një numër shumë të madh të shteteve të cilat kanë shprehur gatishmëri dhe kanë ekipet e tyre në vendin e ngjarjes, duke përfshirë edhe Kosovën. Është një mobilizim i madh dhe gjithsesi ndihemi krenar për punën që po bëjnë trupat e FSK-së të cilat me angazhimin e tyre po bëjnë që të jenë të pranishëm edhe në mediat vendore për ngjarjen e dy vjeçares që është nxjerr dje me nënën e saj”, ka deklaruar ai.
Sipas tij, mbi 40 shtete kanë dërguar ndihmat dhe ekipet e tyre për të ndihmuar në këtë situatë.
“Është një hapësirë shumë e gjerë dhe nevojitet numër i madh i ekipeve për të mbuluar gjithë këtë hapësirë, për fat të keq në zonat e thella ndoshta ende ndjehet mungesa e ekipeve të nevojshme për të bërë atë që duhet. Megjithatë ka mbi 40 shtete që kanë dërguar ndihmat e tyre apo ekipet për të ndihmuar në këtë situatë”, theksoi Zajmi. /Teve1.info/
