Një qytetar nga Peja është ankuar se nuk ka pasur mjek në Qendrën e Mjekësisë Kryesore Familjare.
Në videon e dërguar për Tëvë1, shihet se asnjë mjek nuk është shfaqur edhe pse qytetari (Agim Delija) ka kërkuar ndihmë, pasi siç thotë ai djalin e tij një vjeçar e ka pasur me temperaturë të lartë.
Delija thotë se ishte ora 19:20 kur ai kërkoi ndihmë në QKMF-në Pejë dhe asnjë mjek nuk ishte.
“Ora 19:20 nuk ki doktor as doktoreshë në Qendrën e Mjekësisë Familjare. Në orën 19:00 kanë pasur të ia nisin punës dhe nuk vjen me ia nis askush”, tha ai.
Tëvë1 ka kontaktuar me Delijan, i cili tha se ka pritur 20 minuta për kontrollim. Sipas tij, kanë qenë edhe 10 pacientë të tjerë duke pritur.
Delija thotë se drejtoresha e QKMF-së nuk ishte në dijeni se kush ishte në punë, teksa deklaron se e njëjta kishte qasje të gabuar.
“Mas 20 minuta pritje ka ardhur një motër dhe e ka hap zyrën por ajo ka thënë se doktoresha nuk mundet me ardhur sepse e kanë transferu në Spital me e zëvendësu dikë. Nuk kam qenë vetëm unë si pacientë por edhe 10 të tjerë. Kam kontaktuar drejtorin e Shëndetësisë së Komunës dhe ai më ka thënë ta kontaktojë drejtoreshën e QKMF-së dhe sipas tij, nuk ishte drejtoresha në dijeni se kush ishte në punë. Ajo kishte qasje të gabuar”, tha ai.
Po ashtu, në video shihet teksa qytetari troket në disa nga dyert e QKMF-së në Pejë dhe nuk lajmërohet askush.
Delija potencon për Tëvë1 se djali i tij një vjeçar ka pasur temperaturën deri në 40. /Teve1.info/