Partia Demokratike e Kosovës ka mbajtur një konferencë për media në të cilën i ka bërë thirrje kryeministrit, Albin Kurti që të shkarkojë ambasadorin e Kosovës në Kroaci, Martin Berishaj.
Deputetja e PDK-së, Eliza Hoxha ka kërkuar që kryeministri Kurti ta sjellë sa më parë ambasadorin Berishaj në Kosovë dhe siç tha ajo, të vendoset para organeve të drejtësisë.
Sipas saj, nëse një gjë e tillë nuk ndodh atëherë Qeveria Kurti sipas saj, duhet ta ndërrojë mbiemrin në Qeveria Martinaj.
“Sonte si PDK kemi organizuar këtë aktivitet, të cilin përmes shkëlqimit të këtij projektori që e kemi në prapavijë duam që të hedhim dritë mbi atë se kush në të vërtetë e udhëheq këtë qeveri dhe siç mund të shihni në fotografi janë kryeministri Kurti dhe ambasadori Martin Berishaj me një titull Qeveria Martini. Në realitet të gjithë keni pasur mundësi të lexoni në media të ndryshme se ambasadori Berishaj me paratë që ka tërhequr nga kompania GEN me seli në Beograd e që janë rreth 5 milionë euro, dyshohet se ka financuar fushatën e Lëvizjes Vetëvendosje, kjo është Qeveria Martini e jo Qeveria Kurti”, tha ajo.
Tutje ajo kritikoi Kurtin edhe për qasjen e tij ndaj ambasadorit Martin Berishaj për të cilin ajo tha se po e mbron si mik personal.
“Prej që kur ka shpërthyer ky skandal kryeministri nuk ndërrmer pothuajse asgjë, përkundrazi e mbron si mik personal që e ka PDK bën thirrje edhe njëherë organet e drejtësisë që të veprojnë sepse deri tani ka kallëzime penale dhe padi që janë ngritur në drejtim të Berishajt. Kërkojmë nga Kurti që ta shkarkojë dhe ta sjellë atë sa më parë në Kosovë para drejtësisë, në të kundërtën nuk e meriton kjo Qeveri mbiemrin Kurti, por le të vazhdojë me mbiemrin Martinaj me një gotë poashtu martini për të festuar tutje”, shtoi ajo. /teve1.info./
