Ministrja e Arsimit, Arbërie Nagavci, në konferencën për media ka thënë se përballja me pandeminë dhe probleme me gjetjen e pronave dhe hapësirave, kanë qenë arsye për mosndërtimin e çerdheve të premtuara gjatë fushatës.
E pyetur për ndërtimin e çerdheve dhe shkollave në veri të vendit, Nagavci tha se duhet të punohet më shumë në këtë drejtim.
“Sa i përket ndërtimit të shkollave që janë akoma problematike për fëmijët që vijojnë mësimin në këtë pjesë, por edhe për ndërtimin e çerdheve, është një nga premtimet tona për të cilin jam e vetëdijshhme që duhet të punojmë më shumë në këtë drejtim. Viti i kaluar ka qenë një viti sfidues edhe si pasojë e pandemisë dhe ndryshimeve që janë sjellë”, tha ajo.
Teksa tha se pritet që në fillim të muajit të ardhshëm gjërat të definohet dhe të dihet rruga përpara.
“Gjithsesi sa i përket planifikimit kemi ecur përpara dhe besoj se një formë e re e ndërtimit të çerdheve që jemi duke e shqyrtuar, me analiza të detajuara, besoj që do të na japë mundësi të realizojmë premtimin, por edhe për ndërtime apo përmirësimin e kushteve në Mitrovicën e Veriut. Bëhet fjalë për çerdhet modulare, apo objekte modulare, që janë risi apo diçka që po përdoret në Evropë e jo vetëm. E shkurton kohën e ndërtimit dhe shmang rreziqet për fëmijë në vendet ku bëhen ndërtimet. Problemet kanë qenë edhe me gjetjen e pronave dhe hapësirave”, ka thënë Nagavci.
