Kryetari i Kuvendit të Kosovës, Glauk Konjufca ka thënë se plani franko-gjerman është i pranueshëm për Kosovën, pasi nuk ka Asociacion të Komunave me Shumicë Serbe në të.
Sipas tij, duhet të gjendet një formë e re e Asociacionit.
“Kryeministri Kurti para tre muajsh ka thënë që është bazë e mirë që të vazhdohet më tutje. Nuk e di përse i gjithë ky pluhur kur kryeministri ka thënë se ky plan është i pranueshëm për Kosovën, për arsye se aty nuk përmendet kurrfarë Asociacioni”, tha Konjufca.
Ai ka thënë se me këtë plan Kosova merr një farë obligimi sa i përket marrëveshjeve të kaluara e që nënkupton Asociacionin të cilin sipas tij, Gjykata Kushtetuese e ka hedhur poshtë.
“E tëra që mund të aludohet për nënkuptim në atë plan është që marrëveshjet e deritanishme të arritura në dialog. Pra Kosova e merr një farë obligimi për marrëveshjet e deritashme që janë arritur në dialog, pra në këtë aspekt mund të thuhet eksplicit është referenca e Asociacionit. Por çështja është se këtë Asociacion e ka hedhur poshtë Kushtetuesja dhe tash çështja është të gjendet një formë e re e Asociacionit. Por kjo është e vështirë pas Gjykata Kushtetuese e ka hedhur poshtë në 23 pika”, tha kreu i Kuvendit.
“Përbrenda Kushtetutës së Kosovës është e lejueshme vetëm një formë e Asociacionit të Komunave, e cila është formale, simbolike, me takime në të cilat komunat ndajnë shqetësime për problemet e tyre të përbashkëta në Republikën e Kosovës. Eventualisht krijojnë ndonjë mekanizëm për atë që lidh interesat e përbashkëta në fusha të veçanta, që janë specifike për rajone të veçanta, psh për ujërat, për mbeturinat – menaxhimin më të mirë të mbeturinave, edhe për çështje të ndryshmekulturore, pse jo. Pra nuk janë të pamundshme asociacionet në Kosovë. Unë mendoj se janë dy rreziqe për Kosovën. E pse kjo nuk është zgjidhja më e mirë dhe pse është kompromis. Është kompromis sepse nuk e ka njohjen legale, por është njohje ‘de-facto’, pra shtetësia e Kosovës nga Serbia nuk pranohet drejtpërdrejt, por në mënyrë të tërthortë”, tha tutje Konjufca.
Në fund, Konjufca i cili ka qëndruar për një vizitë në Këshillin e Evropës ka thënë se fatkeqësisht ka krijuar një përshtypje se çështja e anëtarësimit të Kosovës në KE “gjithnjë e më shumë po bëhet e ndërlidhur” me dialogun me Serbinë. /EO/
