Asociacioni i Gazetarëve të Kosovës ka cilësuar se emërimi i Rilind Gërvallës, për drejtor të kanaleve shqip në RTK, përbën konflikt interesi.
Në njoftimin e AGK-së, thuhet se emërimi i Gërvallës cenon rëndë pavarësinë e transmetuesit publik pasi sipas AGK-së, Gërvalla ka demonstruar publikisht mbështetjen për partinë në pushtet dhe e ka promovuar atë aktivisht.
“AGK-ja, konsideron se emërimi i Rilind Gërvallës – mbështetës i Lëvizjes Vetëvendosje (VV), për drejtor të kanaleve shqip në RTK, përbën konflikt interesi dhe cenon rëndë pavarësinë e transmetuesit publik. Gërvalla ka demonstruar publikisht mbështetjen për partinë në pushtet dhe e ka promovuar atë aktivisht.Rekomandimi dhe emërimi i tij është në kundërshtim me praktikën e mirë që është krijuar gjatë përzgjedhjes së bordit të RTK-së, proces ky që ishte lavdëruar ndërkombëtarisht, si transparent dhe profesional”, thuhet në njoftim.
Teksa theksohet se një proces i ri rekrutimi, pa ndërhyje politike është i nevojshëm, sepse sipas AGK-së, ky zhvillim do të ndikojë negativisht në renditjen e Kosovës sa i përket lirisë së medies.
“Ne besojmë që një proces i ri rekrutimi, në baza të meritokracisë dhe pa ndërhyje politike është i nevojshëm dhe do të lejonte vazhdimin e depolitizimit të transmetuesit publik, dhe do të krijonte atmosferë ku gazetarët mund të veprojnë të lirë pa presion politik. Ky zhvillim do të ndikojë negativisht në renditjen e Kosovës sa i përket lirisë së medies”, thuhet tutje.
Ndryshe, Bordi i RTK-së, me tetë vota për dhe asnjë kundër, ka miratuar rekomandimin e drejtorit të përgjithshëm të RTK-së, për emërimin e Rilind Gërvalla në pozitën e drejtorit të kanalit shqip të RTK-së (RTK1, 3, 4)./teve1.info./
https://teve1.info/lajmet/rilind-gervalla-emerohet-drejtor-i-rtk-se/
