Ministri i Jashtëm i Serbisë , Ivica Daçiq, ka thënë se edhe pse i njohin “vijat e kuqe” të Serbisë, në Washington dhe Bruksel kanë ndryshuar qëndrim ndaj tyre duke e vlerësuar qasjen e Serbisë ndaj dialogut si “konstruktive dhe të përgjegjshme”.
Në një intervistë për Zërin e Amerikës, Daçiq theksoi dy vija të kuqe – çështjen e njohjes së Kosovës, pra çështjen e anëtarësimit të Kosovës në Kombet e Bashkuara dhe – siç tha ai – “një parakusht për të gjitha parakushtet” që së pari të formohet Asociacioni i Komunave me Shumicë Serbe.
“Është diçka për të cilën realisht nuk kemi nevojë të diskutojmë apo negociojmë përsëri, sepse është diçka për të cilën ndoshta jemi pajtuar kur e kemi nënshkruar atë marrëveshje 10 vjet më parë”, tha shefi i diplomacisë serbe, transmeton teve1.info.
Daçiq thekson se gjëja më e rëndësishme për të gjatë qëndrimit në Uashington ishin bisedimet në Departamentin e Shtetit, me zyrtarët që takoi së fundi në Beograd – këshilltarin Derek Chollet dhe të dërguarin special për Ballkanin Perëndimor Gabriel Escobar.
“Temat qendrore ishin marrëdhëniet tona dypalëshe, pra se si të përpiqemi të përparojmë në ato marrëdhënie. Mendoj se është e rëndësishme edhe telefonata që Sekretari i Shtetit Blinken bëri me presidentin Vuçiq para seancës së sotme të Kuvendit të Serbisë. Ajo thirrje ishte pasojë e drejtpërdrejtë e qëndrimit që mund të dëgjoja si në Bruksel ashtu edhe këtu në Uashington – dhe mendoj se ky është ndoshta mesazhi më i rëndësishëm, që është se performanca dhe pozicioni i presidentit Vuçiq, pra i Serbisë, vlerësohet si konstruktiv dhe i përgjegjshëm. Dhe shpesh krahasohet me Prishtinën dhe Kurtin – për të cilët ka vlerësime të kundërta”, tha Daçiq, transmeton teve1.info.
“Këtu kam dëgjuar se shprehen pozitivisht për Serbinë dhe vetë thonë se qëndrimi i QUINT-it, përfshirë edhe SHBA-së, ka ndryshuar shumë në raport me këtë pozicionim të Serbisë, gjë që tregon se ka qenë një vendim i drejtë”.
Duke folur për 6 kushtëzimet e kryeministrit Kurti për Asociacionin, Daçiq tha se është shumë e vështirë të diskutohen ato, kur marrëveshja është nënshkruar para 10 vitesh.
“Përfaqësuesit ndërkombëtarë më thanë se ai u tha se nuk do ta formoj Asociacionit e Komunave Serbe para se të nënshkruhet ajo marrëveshje, dhe para nënshkrimit të marrëveshjes ai kërkon që pesë vendet anëtare të Bashkimit Evropian që nuk e kanë njohur Kosovë ta njohin Kosovën, që ai të hyjë në zbatimin e kësaj marrëveshjeje, dhe së dyti, t’i thuhet data e saktë se kur do ta pranojnë kërkesën e tij për anëtarësim në Bashkimin Evropian dhe në NATO… Në këtë moment, gjithçka e ashpër. Kritikat dhe presionet kanë për qëllim në radhë të parë Prishtinën”, tha Daçiq.
