Policia e Kosovës ka arrestuar një person në Rahovec pasi dyshohet se ka kryer veprat penale “Shkaktim i rrezikut të përgjithshëm” dhe “Mbajtje në pronësi, kontroll ose posedim të paautorizuar të armëve”.
Pas kontrollit në shtëpinë e të dyshuarit në Dejnë të Rahovecit, policia ka gjetur një pushkë gjysmë automatike, një pushkë automatike, një mitraloz, 130 copë fishekë dhe 26 gëzhoja.
Me vendim të prokurorit i njëjti është dërguar në mbajtje për 48 orë.
Njoftimi i plotë i policisë:
Arrestohet një person i dyshuar për veprën penale “Shkaktim i rrezikut të përgjithshëm” dhe “Mbajtje në pronësi, kontroll ose posedim të paautorizuar të armëve”
Rahovec, 30 janar 2023
Pas një hetimi preliminar të zhvilluar nga Njësia e Hetimeve në kuadër të Stacionit Policor në Rahovec, lidhur me informatën e pranuar se i dyshuari Z. M., i lindur në vitin 1987, shtetas i Republikës së Kosovës, posedonte armë në mënyrë të paautorizuar, me datën 30.01.2023 në koordinim me Prokurorin e Shtetit dhe në zbatim të urdhër kontrollit të lëshuar nga Gjykata, është kryer kontroll në vendbanimin e tij në fshatin Dejnë-Rahovec.
Gjatë kontrollit në posedim të të dyshuarit janë gjetur dhe janë sekuestruar:
- Një pushkë gjysmë automatike,
- Një pushkë automatike,
- Një mitraloz si dhe
- 130 copë fishekë të llojeve të ndryshme dhe 26 gëzhoja.
Pas intervistimit, me vendim të Prokurorit të Shtetit i dyshuari është ndalur në mbajtje për 48 orë, dhe ndaj tij është iniciuar rast “Shkaktim i rrezikut të përgjithshëm” dhe “Mbajtje në pronësi, kontroll ose posedim të paautorizuar të armëve”.
