Arton Demhasaj, drejtor i Organizatës Çohu ka thënë se ky projekt tashmë mund të konsiderohet i mbyllur.
“Fakti që ne i kemi thënë jo këtij projekti por i kemi përdor fondet e MCC për bateri, mund të konsiderohet se ky është projekt i mbyllur. Edhe nëse i referohemi Strategjisë Energjetike edhe ajo nuk e përfshin këtë projekt dhe ky mund të konsiderohet projekt i mbyllur”, ka thënë Demhasaj.
Sipas tij financimi i këtij projekti do të ishte gjysma nga MCC e gjysma nga Qeveria.
“Është projekt që ka ardhë përmes MCC-së që është mundu ta përfshijë edhe Kosovën në këtë proces të gazifikimit ku një pjesë të madhe të fondeve edhe për shpërndarjen ka qenë e mbulume nga MCC 50 % e shumës, e 50 % i ka taku Qeverisë që të investojë në mënyrë që ne të bëhemi pjesë e këtij projekti të gazifikimi ndërkombëtar”.
Demhasaj ka shtuar se projekti i baterive është i mirë mirëpo Kosova ka nevojë për burime të energjisë.
“Bateritë janë shumë të nevojshme për shkak të balancit të përdorimit të energjisë natën me ditën, por Kosova ka probleme me siguru burime të energjisë elektrike, pra ne e shohim që në bazë të kapaciteteve momentale që i kemi, me dy termocentrale Kosovën A dhe Kosovën B e kemi të pamundshme me i mbulu nevojat sidomos në sezonin e fund-vjeshtës deri në pranverë, e kemi shumë problem për me i mbulu kërkesat e qytetarëve. Prandaj detyrohemi me ble në treg, ne i kemi pa sidomos në dy vitet e fundit çfarë çmime janë”, ka thënë ai në Ditari në Tëvë 1.
“Prandaj mendoj se Qeveria është dashur të angazhohet më tepër se si të sigurojë burime të reja të energjisë elektrike, që të shkojmë kah efiçienca sa më shumë, por ideja është që të kemi qëndrueshmëri energjetike se ajo po konsiderohet tash për tash prej elementeve kryesore të sigurisë kombëtare të një vendi”, ka thënë Demhasaj.
Demhasaj ka thënë se projekti i gazifikimit përfshinte edhe ndërtimin e ngrohtoreve të reja që do ta zgjidhnin shumë problemin e ngrohjes.
“Një mundësi ka qenë kjo e gazifikimit, nuk ka qenë mundësia vetëm që përmes këtij projekti të ndërtohet një termocentral i ri që të prodhonte energji elektrike nga gazi, por të ndërtoheshin edhe 5 ngrohtore të reja, e ndërtimi i tyre do ta reduktonte edhe konsumin e energjisë elektrike me rreth 50 %. Nëse ishin ndërtu ngrohtoret me gaz, shumica e qytetarëve do ta kishin shfrytëzu edhe ngrohjen nga ato ngrohtore”.
“Do të duhej të sqaronte ministria se pse e ka refuzuar këtë projekt. Normalisht që ka mund të ketë pasur telashe të tilla sa i përket çmimeve, por mendoj që ka qenë projekt serioz me u studiu mirë, e ku ka pasë probleme mendoj se do të mund të përmirësoheshin”, ka shtuar Demhasaj.
