Por, nga opozita në vazhdimësi është kritikuar kryeministri Albin Kurti, për mungesë të transparencës në dialog.
Analisti, Arbnor Sadiku thotë se duhet të ketë transparencë më të madhe në këtë proces, si dhe përfshirje të akterëve të tjerë.
“Sa i përket kësaj nismës franko-gjermane sigurisht që do të duhej të ishte Qeveria e Kosovës më transparente, sepse deri më tani është krijuar përshtypja që më tepër ka qenë një dialog i elitave politike të Kosovës dhe Serbisë, se sa një dialog i cili ka rrjedhur nga poshtë lartë, ku aty ka qenë i përfshirë shoqëria civile edhe mediat dhe gjithë spektri tjetër i opinionit publik në Kosovë”, tha Sadiku.
E njohësi i procesit të dialogut, Visar Xani, thotë se arritja e një marrëveshje eventuale, mund të përdoret politikisht nga partitë për shkak se aktualisht nuk ka transparencë.
“Derisa nuk kemi një mekanizëm të verifikuar të disponimit qytetarë çdo herë kjo do të përdoret politikisht qoftë pro, qoftë kundër që në të ardhmen do të përdorin partitë politike dhe varësisht nga koha dhe momenti që ju konvenon. Pra, meqenëse nuk ka një mekanizëm tjetër është e pamundshme të kemi një verifikim të disponimit dhe atë mosverifikim të disponimit sigurisht partitë politike do ta përdorin qofshin parlamentare ose jashtë parlamentare”, tha Xani.
Mos-transparencën në dialog ekzekutivi e ka arsyetuar duke thënë se është kërkesë e ndërkombëtareve që plani franko-gjerman të mos bëhet publik.
Kronika e gazetarit Valmir Gallopeni.
