Presidenti i entitetit të Republikës Serbe, Milorad Dodik, po thotë se qëllimi kryesor i Serbisë në dialog është që Asociacioni një ditë të jetë Republikë Serbe brenda Kosovës.
Madje politikani nacionalist shprehet i bindur se kjo të ndodhë në një të ardhme të afërt.
“Është shumë mirë që thonë kështu, një ditë do të jetë ‘Republike Serbe’. E kam fjalën në kuptimin e saj thelbësor. Po, do të quhet Asociacion i komunave serbe, por do të ketë funksione ekzekutive të qeverisë siç ka Republika Serbe. Ky është problem për ta dhe kjo është e gjithë historia”, ka thënë ai.
Këto deklarata të Dodikut i ka komentuar për Tëvë1, analisti gjerman Bodo Weber.
Ai konsideron se këto deklarata që kanë ardhur nga Milorad Dodik nuk janë rastësi.
Sipas tij, një qasje e tillë e minon procesin e dialogut mes Kosovës dhe Serbisë.
“Duke pasur parasysh faktin se presidenti Vuçiq ka krijuar një aleancë të ngushtë me Dodikun gjatë viteve të fundit, deklarata të tilla, minojnë drejtpërdrejt garancitë e negociatorëve perëndimorë drejtuar Prishtinës se asociacioni nuk do të përfundojë të jetë një lloj Republike Serbe. Këto deklarata vështirë se mund të konsiderohen rastësi, por më tepër një përpjekje e Beogradit për të minuar negociatat. Nëse jo, Vuçiq do të duhej të distancohej menjëherë nga deklaratat e Dodik”, tha Weber për Tëvë1.
Edhe Këshilltari i Departamentit amerikan të Shtetit, Derek Chollet ka deklaruar se Asociacioni i komunave me shumicë serbe në Kosovë nuk do të jetë një mekanizëm që do t’i përngjajë Republikës Serbe në Bosnjë dhe Hercegovinë.
Televizioni ka pyetur Bashkimin Evropian lidhur me deklaratat provokuese të Milorad Dodik, por nga blloku evropian kanë refuzuar të kthejnë përgjigje për këtë çështje.
Kronika e realizuar nga Shpat Blakçori
