Sipas tyre, bazuar në Ligjin për Tatim në Pronë, MF-ja obligohet që ta bëjë në baza të rregullta vlerësimin e pronave të paluajtshme, ndërsa shkallën e tatimit e përcaktojnë vetë komunat.
“Departamenti i Tatimit në Pronë, në kuadër të MFPT, përgjatë vitit 2022 ka kryer vlerësimin e përgjithshëm të tokave dhe objekteve rezidenciale, si dhe ka përpiluar raporte të vlerësimit për prona rezidenciale më datë 31.10.2022, për të cilat janë njoftuar të gjitha Komunat. Përgjatë vlerësimit të pronave rezidenciale, Departamenti i Tatimit në Pronë ka bashkëpunuar ngushtë me komunat për të përcaktuar çmimin për m2 për objekte dhe toka”, thuhet në njoftim.
Siç bën të ditur MF, vlerësimi i përgjithshëm kryhet duke u bazuar në vlerën e tregut me ç’rast Departamenti i Tatimit në Pronë përdor të dhënat siç janë kontrata të shitblerjeve për prona rezidenciale (jo më të vjetra se 3 vjet), intervista me agjentë të shitjes së pronave të paluajtshme, anketime të pronarëve të pronave, intervista me zyrtarë bankash në lidhje me vlerat e pronave që përdoren si kolateral, vlera të pronave që janë shpronësuar, të dhëna të qirave; dhe të dhëna nga kompani të ndërtimit.
Tutje, bëhet e ditur se në vitin tatimor 2023 nuk zbatohet zbritja e përgjithshme për tokat, pasi që tanimë është në vitin e 5-të të tatimimit të tokave.
“Nga ky vit, të gjitha tokat rezidenciale, komerciale, industriale dhe pyjore tatimohen me 100% të vlerës së vlerësuar, për dallim nga viti i kaluar ku është zbatuar zbritja e përgjithshme prej 20%, ku tokat janë tatimuar me 80% të vlerës së vlerësuar”, thuhet tutje në njoftim.
MF-ja po ashtu u ka bërë thirrje qytetarëve që për çdo ankesë ndaj vlerës së vlerësuar për pronën e tyre të udhëzohen pranë komunës për të paraqitur ankesë, e cila pastaj shqyrtohet nga Departamenti i Tatimit në Pronë në Ministrinë e Financave, Punës dhe Transfereve.
Ky vendim për rritjen e tatimit në pronë është kundërshtuar edhe nga LDK e PDK
Dje në rrjetet sociale është raportuar se Komuna e Prishtinës ka rritur tatimin në pronë, me ç’rast dhjetra qytetarë kanë reaguar duke e quajtur si vendim absurd.
Pas kësaj, Komuna e Prishtinës ka reaguar duke thënë se nuk e ka bërë përcaktimin e shumave në faturat e qytetarëve për vitin tatimor 2023, pasi sipas tyre është Ministria e Financave ajo e cila bën vlerësimin dhe përcakton zonat e nivelet e vlerave. /Teve1.info/
