Këtë deklaratë Hasani e bëri në emisionin “ResPublika” në Tëvë1 teksa tha se debatin për bisedime e sheh si të kotë pasi që, sipas tij, nëse nuk ka një njohje nuk ka çfarë të bisedohet.
“Nëse nuk ka një njohje reciproke ose njohje me Serbinë, që Serbia ta njeh Kosovën, t’i njeh të drejtat dhe ta njeh gjendjen faktike, cila është ajo marrëveshje, nuk kanë kuptim marrëveshjet. Marrëveshjet duhet të kenë kuptim kur ne e njohim njëri-tjetrin”, tha ai.
Tutje Hasani tha se Kosova nuk duhet të kthehet mbrapa se dhe të bëjë diçka që është në dëm të saj.
“Ne duhet t’ua themi troç edhe bashkësisë ndërkombëtare edhe vendorëve edhe gjithë miqve edhe atyre që nuk na duan edhe atyre që na duan, edhe ata që na mbështesin edhe ata që nuk na mbështesin. Kosova nuk kthehet më mbrapa, Kosovën nuk mund ta kthejë askush mbrapa pavarësisht se çfarë presioni mund të bëjnë, nuk duhet të pajtohet me diçka që është në dëm tëndin. Nëse nuk ka njohje është e kotë të bisedohet, është e kotë të shkosh në Bruksel dhe të kthehesh për të dalë në fotografi”, shtoi Hasani./teve1.info/
