Shala në emisionin “Info Nata” në Tëvë1, tha se aspekti i mospërcaktimit të vlerës monetare të koeficientit dëmton parashikueshmërinë dhe sigurinë juridike.
“Janë disa probleme në këtë ligj të cilat bëjnë që ky ligj nuk i përmbahet Kushtetutës së Kosovës. Kur flasim për aspektin e mospërcaktimit të vlerës monetare të koeficientit, qartazi nuk është diçka normale që sot është ligji i publikuar në gazetën zyrtare dhe askush nga nëpunësit e sektorit publik nuk e di se sa e ka pagën dhe ky është një aspekt shumë problematik. Mospërcaktimi i vlerës monetare të koeficientit e dëmton parashikueshmërinë dhe sigurinë juridike”, ka deklaruar ai.
Sipas tij, ky ligj ka një tendencë për uljen e pagave të gjyqtarëve dhe prokurorëve.
“Ka shumë shkelje të tjera kushtetuese, ka shkelje të barazisë para ligjit, ka një tendencë për uljen e pagave të gjyqtarëve dhe prokurorëve që nuk është e pranueshme, ka cenim të pavarësisë funksionale të sistemit të drejtësisë dhe ka shumë aspekte të tjera që e bëjnë këtë ligj të pakalueshëm për filtrat e Gjykatës Kushtetuese”, tha Shala. /Teve1.info/