Sa i përket dialogut Kosovë-Serbi, Nehammer theksoi se të dyja shtetet duhet të ballafaqohen me njëra tjetrën për të arritur një marrëveshje të suksesshme.
Madje sipas Nehammer, shteti i Austrisë tanimë është një urë lidhëse për rregullimin e marrëdhënieve mes të dyja palëve, raporton teve1.info.
“Austria e sheh vetën së pari jo vetëm në marrëdhëniet midis Kosovës dhe Serbisë, por në lidhje me të gjitha shtetet e Ballkanit Perëndimor si urë me Bashkimin Evropian. Pra, edhe në situatën midis Kosovës dhe Serbisë ne e shohim veten si urë lidhëse. Të dyja shtetet duhet të gjejnë një lloj mënyre që të ballafaqohen me njëra tjetrën dhe të krijojnë një të ardhme paqësore, po aq sa është e mundur”, u deklarua Nehammer para medieve.
Njëherit, Nehammer e konsideron të rëndësishme që partnerët ndërkombëtarë të lënë hapësirë mes të dyja palëve, pasi siç tha ai, ato duhet të vendosin vetë se sa larg duan të shkojnë me negociata.
“Njëkohësisht, Austria gjithmonë do jetë e gatshme të ndihmojë, të ofrojë ndihmë dhe përkrahje, ku për arsye të ndryshme nuk mund të gjendet kompromisi. Prandaj, Austria është partnere e mirë në këtë drejtim dhe kjo besoj që është për shkak të historisë austriake”, shtoi tutje Nehammer.
Më tej, kancelari austriak tha se në momentin kur veprojnë të gjithë së bashku, vetëm në atë mënyrë mund të arrihet paqja dhe siguria.
“Kanë ndodhur shumë gabime në të kaluarën tonë historike, kemi nxjerrë mësimet tona nga to. Me këtë përvojë historike ne u ofrojmë ndihmë dialogut mes Kosovës dhe Serbisë. Pasi që vetëm paqja, siguria, mund të sigurohen vetëm kur bëhemi bashkë dhe veprojmë bashkë”, potencoi ai.
Megjithatë, Nehammer vlerësoi se përsëri nuk varet vetëm nga negociatorët që marrëveshja të jetë e suksesshme.
“Pra ne jemi aty si urë lidhëse, do jemi në dispozicion për çfarëdo lloj ndihme apo shtytje në këtë drejtim”, tha tutje ai.
Gjithashtu, Nehammer ka thënë se Austria ofron numër më të madh të trupave në KFOR si shtet jashtë NATO-s.
Ai i pyetur për kërkesën e Kurtit që të ketë shtim të forcave të KFOR-it në Kosovë, tha se nëse një gjë e tillë kërkohet ata janë të gatshëm për të dërguar trupa shtesë.
“Pra jemi plotësisht të bindur dhe të gatshëm që të ofrojmë më shumë trupa nëse kjo kërkohet zyrtarisht edhe nga NATO-ja, nga KFOR-i dhe gjithsesi që qëndrojmë në dispozicion për të ndihmuar në dialog kudo e sido që të na kërkohet. Kemi më shumë se 300 ushtarë që kryejnë detyrat e tyre në Kosovë për paqe dhe siguri, ne mbështetim thirrjen e Kosovës për rritje të trupave për siguri më të madhe dhe duhet të jemi të gatshëm që të ofrojmë trupat mbështetës nëse KFOR-i na kërkon këtë gjë, sepse është me rëndësi të dihet se edhe komunitetet e ndryshme pajtohen me pranin e KFOR-it”, ka deklaruar Nehammer.
Nehammer njëherit ka vlerësuar se Austria mund të ndërhyjë vetëm kur e sheh të domosdoshme një gjë të tillë./teve1.info/.
