Haradinaj ka shkruar se gjatë takimit me këshilltarin e Departamentit Amerikan të Shtetit, Derek Chollet, ka shtruar nevojën urgjente për marrëveshjen finale për njohje të ndërsjellë me Serbinë.
“Në një takim përmbajtësor me delegacionin nga Departmenti i Shtetit i kryesuar nga z. Derek Chollet, Këshilltar i lartë, z. Gabriel Escobar, Ndihmës Asistent i Sekretarit të Shtetit për Çështje të Evropës dhe Evroazisë, z. Spencer Boyer, Zëvendës Ndihmës Sekretar i Mbrojtjes për Politikat Evropiane dhe NATO-n, dhe me Ambasadorin Amerikan në Kosovë, z. Jeffrey Hovenier, shtrova nevojën urgjente të arritjes së marrëveshjes finale për njohje të ndërsjellë me Serbinë, si hap i domosdosshëm për normalizimin e marrëdhënieve midis dy shteteve”, ka shkruar Haradinaj në “Facebook”.
Njëherit, Haradinaj ka njoftuar se ka shtruar nevojën edhe për integrimin e plotë të qytetarëve serbë në institucionet e Republikës së Kosovës, duke përfshirë këtu edhe zbatimin e plotë të rendit dhe ligjit në çdo pjesë të vendit.
“Falënderova përfaqësuesit amerikanë për ndihmën e vazhdueshme të ShBA-ve në të gjitha fazat e lirisë dhe shtetndërtimit të Kosovës dhe kërkova mbështetjen e tyre edhe në këtë fazë të ndjeshme pa të cilën vështirë se do të mund të arrijmë një marrëveshje përfundimtare të paqes”, thuhet tutje në postimin e Haradinaj.
Kujtojmë se sot Këshilltari i lartë në Departamentit amerikan të Shtetit, Derek Chollet ka pasur vizitë në Kosovë./teve1.info/.
