Megjithatë, Bulliqi 2022-tën e vlerësoi si një vit shumë sfidues, teksa shtoi se do ketë projekte që veçse janë nisur, mirëpo do përmbyllen me sukses në vitin 2023.
“Ky vit, është viti që Komuna e Podujevës ka buxhetin më të madh. Është një buxhet diku prej 27 milionë e 406 mijë euro. Përafërsisht kemi 4 milionë më shumë buxhet sesa në vitin 2022. Kjo do na mundësojë t’i realizojmë një varg projektesh. Në përgjithësi ka qenë një vit shumë sfidues. Sidoqoftë, besoj që në fund kemi arritur që suksesshëm ta përmbyllin vitin paraprak. Po ashtu, ka pasur edhe projekte të cilat janë nisur në vitin 2022 dhe do përmbyllen me sukses në vitin 2023. Me siguri që viti 2023 do jetë vit i cili do i përmbyll këto projekte të mëdha”, deklaroi Bulliqi në emisionin “Ditari”.
Tutje, Bulliqi përmendi edhe disa nga planet e Komunës së Podujevës për këtë vit, e të cilat tha se e kalojnë shumën mbi 6 milionë euro të investimeve kapitale.
“Unë do i përmend vetëm disa nga projekte të cilat janë më të mëdha, të cilat kalojnë shumën më shumë se 6 milionë euro të investimeve kapitale. Është rasti i fillimit të punimeve në ndërtimin e urgjencës së qytetit të Podujevës, fillimi i ndërtimit të stacionit të autobusëve, i cili po ashtu ka vlerë mbi 1 milion euro, fillimi i procedurave të shpronësimit për zonën industriale të Podujevës, por edhe fillimi i punëve dhe përafërsisht pjesa dërrmuese kryerja e tyre në rrugën Skënderbeu”, u shpreh Bulliqi në Tëvë1.
Njëherit, pjesë e këtyre projekteve, Bulliqi tha se do jetë edhe ndërtimi i ambulancës në fshatin Lluzhan, përmbyllja e një varg rrugësh të cilat tanimë janë shtruar me asfalt si dhe projekte nëntokësore, si kanalizimet dhe furnizimi me ujë të pijshëm.
Ndërkaq, i pari i Podujevës potencoi se do realizohen edhe disa projekte tjera me përkrahje nga Ministria e Arsimit.
“Do fillojmë ndërtimin e shkollës së re fillore në fshatin Domosh. Po ashtu, është ndarë diku një shumë prej 500 mijë euro për ndërtimin e shkollës së mesme ekonomike në qytetin e Podujevës, projekt që do kushtojë përafërsisht rreth 2 milionë euro. Kemi edhe projektin tjetër që do jetë ndërtimi i çerdhes në fshatin Batllavë, e që realizohen si projekte të Ministrisë së Arsimit”, theksoi Bulliqi./teve1.info/.
