Përmes një postimi në Facebook, Krasniqi ka thënë se Ushtria e Kosovës është e gatshme për çdo mision ushtarak, raporton teve1.info
Ai theksoi se fraza “prej sot gatitu” jehoi katër vite më parë në Kuvendin e Kosovës për të shënuar themelimin e Ushtrisë së Kosovë.
“Prej sot gatitu”, është fraza kumbuese që jehoi katër vite më parë në Kuvendin e Republikës së Kosovës, për të shënuar themelimin e Ushtrisë së Kosovës, si një nga proceset më të rëndësishme të determinimit të shtetësisë dhe sovranitetit të vendit tonë”, ka shkruar Krasniqi.
Tutje Krasniqi u shpreh krenar që katër vite më parë votuan masivisht tri ligjet përkatëse duke i thënë FSK-së mandatin dhe kompetencat që i meriton.
“Krenar që më 14 dhjetor të vitit 2018, si deputetë të Kuvendit të Kosovës, votuam masivisht tri ligjet përkatëse duke i dhënë FSK-së mandatin dhe kompetencat që ajo dhe tërë Kosova i meritojnë. Ushtria e Kosovës, e cila ka përvetësuar standardet e NATO-s, si dhe zotëron e dëshmon nivel të lartë të përgatitjes profesionale, sot është e gatshme për çdo mision ushtarak, duke e bërë krenar secilin prej nesh”, ka shkruar kreu i PDK-së.
Ushtarëve posaçërisht, por të gjithë Kosovës në përgjithësi, urime Dita e themelimit të Ushtrisë!
Ndryshe, sot janë bërë katër vjet nga formimi i Ushtrisë së Kosovës, ku parlamenti i Kosovës me 106 vota pro dhe një abstenim më 14 dhjetor 2018 miratoi tri ligjet që e ndryshojnë mandatin e Forcës së Sigurisë së Kosovës në ushtri të Kosovës, por pa i’u ndërruar emri./teve1.info