Këtë e ka bërë të ditur, presidenti shqiptar, Bajram Begaj përmes një postimi në Facebook.
“Betimi i z. Genti Ibrahimi sot si gjyqtar i Gjykatës Kushtetuese konsolidon funksionalitetin e plotë të këtij institucioni kushtetues. Ky zhvillim është një kontribut i rëndësishëm në zbatimin e reformës në drejtësi si dhe mirëfunksionimin e shtetit ligjor, si një ndër shtyllat themelore të një demokracie. Gjykata Kushtetuese ka një rol thelbësor në ruajtjen dhe mbrojtjen e balancave të shtetit të së drejtës dhe realizimin e drejtësisë kushtetuese”, ka shkruar ai.
Sipas Begajt, plotësimi si dhe mirëfunksionimi i këtij institucioni është një garanci për respektimin e dokumentit themeltar të shtetit shqiptar dhe mbrojtjen e të drejtave dhe lirive themelore të njeriut.
Më tej ai tha se “Vendimmarrjet e rëndësishme të saj, sikurse vendimi më i fundit i Gjykatës Kushtetuese, që garanton ushtrimin efektiv të së drejtës kushtetuese të votës së emigrantëve, flasin për përgjegjësinë profesionale që gjyqtarët e kësaj gjykate mbartin gjatë veprimtarisë së tyre, si dhe peshën që këto vendime kanë për shoqërinë tonë dhe diskursin publik që zhvillohet brenda saj”. /Teve1.info/
