Këtë deklaratë Sveçla e bëri në një konferencë të përbashkët për media me Kryemininstrin , albin Kurti, përcjellë teve1.info.
“Unë bëra apel që tashmë këto barrikada të hiqen, patjetër që Policia E Kosovës ka kapacitete e duhura që të veprojë në këtë drejtim, ajo bën planet e saj operative dhe në momentin që ata e vlerësojnë të duhur në qoftë se barrikadat nuk hiqen ata do të ndërmarrin veprimet e duhura”, tha ai.
Tutja ministri Sveçla tha se Policia e Kosovës është në koordinim me KFOR-in, me EULEX-in dhe me shtet e Kuintiti teksa theksoi se shumë shpejt do të arrihet situata ku nuk do të ketë barrikada.
“E gjithë kjo është duke ndodhur në koordinim me partnerët tanë, me KFOR-in dhe EULEX-in , me shtet e Kuintiti dhe unë besoj që shumë shpejt do të arrijmë në situatën ku nuk do të ketë barrikada në këto dy rrugë nacionale”, shtoi ai.
Ndërkohë, rrugët në veri të vendit po vazhdojnë të jenë të bllokuara edhe gjatë ditës së sotme, nga barrikadat që u vendosën aty një ditë më parë nga serbët lokalë. Vendosja e barrikadave është bërë në fshatin Rudarë te kryqëzimi, në Bistricë, Cerajë dhe Leposaviq.
Ndryshe, vendosja barrikadave në Rudarë erdhi në shenjë pakënaqësie për arrestimin e ish-pjesëtarit të Policisë së Kosovës, Dejan Pantiq nga radhët e komunitetit serb.
Si rrjedhojë, Policia e Kosovës ka mbyllur rrugët që çojnë për në pikëkalimet kufitare Jarinjë dhe Bërnjak që lidhin Kosovën dhe Serbinë./teve1.info
