Mbi 60 ambasada e konsullata i ka të vendosura Kosova nëpër botë.
Megjithatë në këto misione diplomatike, krahas ambasadorëve e konsujve, kryejnë detyrën vetëm 15 atashe.
Në listën të cilën e ka siguruar televizioni shihet se shumica e atasheve janë të mbrojtjes dhe policorë.
Por për kryetarin e Komisionit për Punë të Jashtme, Haki Abazin, Kosova duhet t’i japë rëndësi emërimit të atasheve edhe të fushave tjera.
“Sidomos kulturorë, meqë kemi një diasporë të shpërndarë gjithandej. Qendrat Kulturore duhet të rihapen sikur që është ajo e Stambollit që është e mbyllur. Ne kemi kërkuar sqarim nga MPJ pse ka ndodhur një gjë e tillë. Atashetë ekonomik janë jashtëzakonisht të rëndësishëm, ne duhet të avancojmë marrëdhëniet në nivelin e shkëmbimeve tregtare përtej asaj që shohim sot”, tha Abazi.
Teksa për ish-ministren e Jashtme, Meliza Haradinaj-Stublla, shërbimi i jashtëm i Kosovës duhet të zgjerohet e specializohet në temat me interes për objektivat kombëtare.
“Misionet tona në Kryeqytetet e Kuintit – SHBA në radhë të parë dhe pastaj të tjerat – duhet të fuqizohen në kapacitete profesionale dhe mbështetje të specializuar diplomatike – në përputhje me objektivat diplomatike të shtetit dhe në mbulueshmërinë gjeografike në të gjitha kontinentet. Kosova nuk do të duhej të lë pa mbuluar asnjë shtet të Bashkimit Evropian, qoftë përmes misioneve rezidente qoftë jorezidente. Po ashtu duhet të caktohen diplomatë që portfolio specifike i kanë shtetet mosnjohëse sidomos tani që pritet të aplikohet edhe në Bashkimin Evropian, pas aplikimit në Këshillin e Evropës”, deklaroi Haradinaj-Stublla.
Televizioni ka kontaktuar edhe Ministrinë e Punëve të Jashtme për t’i pyetur nëse ka nevojë dhe planifikojnë që ta shtojnë numrin e atasheve, por nuk ka marrë përgjigje deri në publikimin e kësaj kronike.
Kronika e realizuar nga gazetari Gojart Jashari.
