Tahiri në Kuvendin e Kosovës tha se si PDK janë mjaft të shqetësuar me gjendjen aktuale në veri, teksa ka kërkuar nga Qeveria të ketë një strategji për trajtimin e kësaj çështje.
“Shohim një angazhim të shtetit serb për ta nxjerrë nga kontrolli jonë institucional këtë pjesë, mirëpo Qeveria e Republikës së Kosovës nuk duhet të ndërrmarë hapa sporadik nuk duhet të bëjë veprime ad-hoc, duhet të ketë një strategji për trajtimin e kësaj zone problematike. Përderisa sulmohet Policia e Kosovës, përderisa sulmohen institucionet e Kosovës ne nuk duhet të ndërrmarim hapa sporadik”, tha ai.
Tutje Tahiri tha se Kosovës i duhet një koordinim me Shtetet e Bashkuara të Amerikës kur gjindemi në situata të tilla të ballafaqimit me Serbinë.
Teksa ka theksuar se nuk duhet të lejohet që kjo pjesë e territorit të jetë në diskutim në tryezën në Bruksel.
“Jemi të shqetësuar me sigurinë e gjithë qytetarëve që janë atje dhe në asnjë rrethane nuk duhet të lejojmë që këta qytetarë të bijnë në provokime të bandave kriminale. Besoj që Republikës tonë më shumë se kurrë kur të vjen puna në ballafaqim me Serbinë, na duhet një koordinim i madh me Shtetet e Bashkuara të Amerikës. Ne nuk duhet të lejojmë që kjo pjesë e territorit të Republikës së Kosovës. të jetë në diskutim në tryezën në Bruksel. Kemi punuar shumë të gjithë së bashku që t’i instalojmë institucionet tona në atë pjesë të Kosovës e Serbia gjithmonë e ka kundërshtuar këtë”. tha ai./teve1.info.