Gjatë diskutimit për zgjatjen e masave emergjente për furnizim me energji, Lekaj tha se Qeveria aktuale, që nga marrja e pushtetit, nuk ka pasur angazhim për ta zgjidhur problemin në sektorin e energjisë.
“Me sa kemi pa, qysh nga fillimi i qeverisjes Kurti, në secilin segment, nga mosdija për udhëheqje, kanë eksperimentuar dhe keni funksionuar me baza emergjente. Është e gjashta herë që marrin vendime të energjisë në dëm të qytetarëve të Kosovës, duke u mbështetur dhe fshehur pas fjalës emergjente. Sqaroni qytetarët e Kosovës që për dy vite qeverisje nuk keni arritur të bëni zgjidhje bazë të sektorit të energjisë duke e ditur që është një temë dhe problem që kërkon punë e angazhim për rregullim të saj. Prandaj, ju tani duhet të funksiononi me terma emergjentë, pa vizion, pa zgjidhje”, tha Lekaj para deputetëve.
Më tej, Lekaj drejtuar Qeverisë Kurti, u tha se ata duhet tu tregojnë qytetarëve që nuk bashkëpunojnë fare me opozitën.
“Tregojuni qytetarëve që ju nuk bashkëpunoni me opozitën. Tregojuni qytetarëve që jeni Qeveri e hajgareve dhe mbi të gjitha tregojuni qytetarëve se si të flenë, si të pastrohen, si të vishen, madje edhe si t’i izolojnë shtëpitë me qëllim që të kalohet ky dimër i ftohtë”, tha Lekaj tutje.
Ndërkaq, për të njëjtin diskutim, Ministrja e Ekonomisë, Artane Rizvanolli, njoftoi se Qeveria tanimë i ka propozuar Kuvendit të Kosovës të bëhet zgjatja e masave emergjente për energji./teve1.info/.
