Sipas Hazirit, emërimi i Nenad Rashiqit në pozitën e ministrit në Qeverinë aktuale, e përjashtoi Kurtin nga Samiti i BE-së.
“Kurti akuzon qeveritë e kaluara për çdo gjë, por emëron ministra nga e kaluara prej Listës “Povratak”. Dikur kësaj liste i referohej me “Serbët e Thaçit” e sot po të njëjtit i rehabiliton në Kabinet ministrash. E sot, kur e tërë Evropa zbarkoi në Samitin historik e më të madhin të organizuar ndonjëherë në Tiranë, Kurti u la jashtë dhe e përcolli prej Prishtinës. Duket se emërimi i Rashiqit e përjashtoi Kurtin nga Samiti historik i Tiranës”, thuhet në postimin e Hazirit.
Madje sipas tij, që nga koha kur Qeveria Kurti është në pushtet, është rrezikuar miqësia permanente me SHBA-të, nepotizmi është më i theksuar si dhe ka shtuar që Kurti vetëm ka penguar vizat duke mos bërë asgjë për MSA e NATO.
“Miqësinë permanente me ShBA-të, të krijuar me shumë mund para 32 vjetësh nga Presidenti Rugova, e rrezikoi seriozisht. Akoma pa i mbush një vit qeverisje, skandalet korruptive pëlcitën ne dikastere qeveritare, derisa nepotizmi dhe kapja e shtetit s’ka qenë kurrë më e theksuar. Pra, veç keni pengu për vizat, asgjë s’keni bërë për MSA e NATO, përpos raporteve të tensionuara me ta”, thuhet tutje në postimin e tij.
Më tej Haziri ka theksuar se që nga shpallja e pavarësisë së Kosovës, në veri është gjendja më alarmante ndonjëherë, raporton teve1.info.
“Në veri jo që nuk e shtriu sovranitetin, por me veprimet e deklaratat populliste të muajve të fundit hoqi dorë krejtësisht, u dorëzua, si gjithmonë. Pra, shenjat janë që zgjedhjet nuk mund të mbahen në katër komunat e veriut”, thuhet tutje.
Teksa në fund ka shtuar se dallimi i Kurtit si kryeministër nga Kurti opozitar është si nata me ditën.
“Por, siç e thotë populli: Marrja askënd nuk e ka mbytë!”, ka shtuar Haziri./teve1.info.
