Sipas një komunikate për medie të lëshuar nga Qeveria, këto deklarime Bislimi i bëri gjatë një takimi me Drejtorin e Përgjithshëm për Punë Evropiane, Leonidas Rokanas.
“Zëvendëskryeministri Bislimi shtoi se qëllimi final i Kosovës është anëtarësimi në Bashkimin Evropian, e tashmë po ndërmerret hapi i parë, që është ai i aplikimit për anëtarësim. Në ndërkohë, vendi po ecën përpara me ritëm të shpejtë në avancimin e agjendës evropiane dhe përafrimit me standardet e Bashkimit Evropian, ku dallohet puna e bërë nga Qeveria në sundimin e ligjit, luftën kundër korrupsionit dhe krimit të organizuar, demokratizimin e shumë fusha të tjera. Ne jemi të gatshëm, që përmes përkushtimit tonë, ta përshpejtojmë progresin në këto fusha dhe rrjedhimisht rrugëtimin tonë drejt Bashkimit Evropian”, thuhet në komunikatën e Qeverisë.
Sipas njoftimi, Bislimi i ka shprehur rëndësinë e të dyja vendeve që të vazhdojnë bashkëpunimin dhe të zgjerojnë hapësirat e ndërveprimit veçanërisht në sferat sociale, kulturore, por edhe në përballimin e sfidave të krizës energjetike dhe tranzicionit drejt energjisë së gjelbër.
“Në përfundim, zëvendëskryeministri Bislimi, ritheksoi angazhimin në rrugëtimin drejt Bashkimit Evropian, mbështetjen e fuqishme të qytetarëve ndaj integrimit në BE, përkushtimin e Kosovës dhe rëndësinë e marrëdhënieve të mira fqinjësore”, thuhet në njoftim.
Ndërsa Rokanas tha se të dyja vendet duhet të intensifikojnë punën dhe angazhimin me njëra-tjetrën.
“Objektivi final për Kosovën duhet të jetë integrimi në Bashkimin Evropian, perspektivë kjo e nisur në Selanik në vitin 2003 për Kosovën dhe të gjitha vendet e Ballkanit Perëndimor, që të ecin së bashku në harmoni dhe në mënyrë gjithëpërfshirëse”, thuhet në komunikatë.
