Sipas njoftimit, vendimi për uljen e pagave nuk do të ekzekutohet derisa gjykata të vendosë me vendim përfundimtar gjyqësor përkitazi me kërkesëpadinë e Shoqatës së Prokurorëve, përcjell teve1.info
“Gjykata Themelore në Prishtinë, Departamenti për Çështje Administrative, me datën 29.11.2022, ka pranuar padinë me nr. 2767/2022 ku Paditëse është Shoqata e Prokurorëve të Kosovës, ndërsa e paditur është Qeveria e Republikës së Kosovës, Zyra e Kryeministrit në Prishtinë, me të cilën ka kërkuar anulimin e vendimit me numër 03/109 i datës 23.11.2022, i nxjerr nga e paditura, Qeveria e Republikës së Kosovës, Zyra e Kryeministrit, me kërkesë që të caktohet masa e përkohshme ndaj të paditurës, përkatësisht të shtyhet ekzekutimi i vendimit të të njëjtit, deri në përfundimin meritor të kësaj çështje në konfliktin administrativ”, thuhet në njoftim.
Më 23 nëntor, Qeveria e Kosovës ka shfuqizuar vendimin e nxjerrë në vitin 2017 nga kabineti qeveritar i Ramush Haradinajt për ndryshimin e pagave të gjyqtarëve dhe prokurorëve. Vendimi i Qeverisë është kundërshtuar nga Këshilli Gjyqësor, i cili ka marrë vendim për reduktimin e punës. /Teve1.info/