Kurti para deputetëve ka deklaruar se aty ku ka vakum duhet të ketë aplikime të reja për punë. Sipas tij, institucionet e Kosovës nuk janë vetëm të një komuniteti, por të të gjithë qytetarëve.
“Çështja e trajtimit të dorëheqjeve të zyrtare policor nuk është vendimi imi as MPB-së, nuk është vendim politik. Vendim politik ka qenë dorëheqja politike, për bindjen time për arsye të paqena. E njëjta krizë morale e individuale i kishte kapur kolektivisht secilin prej tyre në tekstin identik të dorëheqjes, ky është vendim politik. Asnjë serb të mos i braktisë institucionet e Kosovës. Institucionet nuk janë të qeverisë dhe institucionet nuk janë vetëm një komuniteti, por të gjithë qytetarëve”, tha ai.
Po ashtu, Kurti shton se vendimi i dorëheqjes nuk mund të pasohet me thirrje politike për kthim, por me aplikim profesional.
“Aty ku ka vakum duhet të ketë aplikime të reja për punë. Vendimi politik i dorëheqjes nuk mund të pasohet me thirrje politike për kthim por me aplikim profesional të atyre që i duan vendet e punës. Për këtë nuk e vendos as kryeministri e as ministri i brendshëm. Kjo rregullohet sipas procedurave të brendshme që vlen për të gjithë”, theksoi kryeministri Kurti. /Teve1.info/
