Kurti, tha se në për të krijuar paqen në Ballkanin Perëndimor mungon “Serbia demokratike” e cila sipas tij ka aspirata territoriale dhe lidhje të afërta me Kremlinin.
Gjatë fjalimit të tij në Kongresin e 26-të të Internacionales Socialiste, që këtë fundjavë po mbahet në Madrid, kryeministri Kurti e kritikoi Bashkimin Evropian për mosgjetjen e një zgjidhjeje për paqe në rajonin e Ballkanit Perëndimor.
“Përbërësi që mungon për paqen në rajonin e Ballkanit Perëndimor është një Serbi demokratike. Fatkeqësisht, fqinji ynë në veri, dhe ai me të cilin Republika e Kosovës ndan kufirin më të gjatë, është ende një vend autoritar me aspirata territoriale ndaj nesh dhe me lidhje të gjera dhe të afërta me Kremlinin”, tha Kurti.
Sipas tij, që nga mbarimi i luftës në vitin 1999, Serbia e ka kërcënuar Kosovën vazhdimisht me sjellje luftarake.
“Deri më sot, ata i mbajnë 48 instalime ushtarake dhe xhandarmërie në të gjithë kufirin e saj me Kosovën. Për më tepër, që nga shpallja e pavarësisë sonë në vitin 2008, ajo është angazhuar vazhdimisht në fushata që synojnë të minojnë shtetësinë tonë”, tha Kurti.
Kryeministri Kurti përmendi që një praktikë të tillë Serbia e ka vazhduar edhe pas vitit 2010 kur Gjykata Ndërkombëtare të Drejtësisë e dha mendimin e vet për ligjshmërinë e pavarësisë së Kosovës.
“Kohët e fundit, ajo është përpjekur të përdorë ndikimin e saj në pjesën veriore të vendit tonë për të minuar sundimin e ligjit në atë regjion”, u shpreh Kurti.
Kryeministri i Kosovës duke iu referuar filozofit Immanuel Kant, tha se një zgjidhje e vërtetë paqeje nuk është e mundur pa anuluar shkaqet ekzistuese të një lufte të ardhshme.
“Është e qartë, pra, se ajo që kemi pasur në 23 vitet e fundit mes dy vendeve tona është më tepër një armëpushim i thjeshtë sesa një paqe e vërtetë. Pyetja e qartë është: si t’i afrohemi paqes së vërtetë.
Unë besoj se forcimi i demokracisë në Serbi është përgjigja. Kjo mund të duket si diçka me pak gjasa për disa, dhe si një e vërtetë e thjeshtë për të tjerët – megjithatë, kjo është mënyra e vetme që ne dimë për të krijuar kushte për paqen afatgjatë.
Me një Serbi autoritare që refuzon të pranojë krimet e luftës nga e kaluara e afërt, e lëre më të kërkojë falje për to, madje edhe një modus vivendi është e vështirë të arrihet, e lëre më një paqe e vërtetë përgjatë vijave kantine”, u shpreh ndër të tjera Kurti.
Gjatë fjalimit të tij, Kurti përmendi edhe angazhimin e tij në dialog siç e quajti, të hapur demokratik në Bruksel, të lehtësuar nga Bashkimi Evropian.
“Sepse ne besojmë se demokracia elektorale nuk është një formë pa funksion; se opozita duhet të ketë shanse reale për të fituar, se mediat nuk duhet të heshtin kurrë nga partia politike në pushtet dhe se pas hijes së demokracisë parlamentare nuk mund të ketë asnjë aleancë fron-altar që është qendra e vërtetë e pushtetit. Megjithatë, ne diskutojmë me ata që nuk ndajnë të njëjtat besime dhe që nuk kanë të njëjtin realitet”, tha ndër të tjera Kurti.
Sipas tij, Republika e Kosovës është një nga vendet më demokratike në rajon.