Nga e enjtja vetëm 8 shërbime do të kryhen në gjyqësorin e Kosovës.
Seancat e paraburgimit, trajtimi i kërkesave për sekuestrim, rastet e dhunës në familje, rastet që në qendër kanë interesin e fëmijëve, janë ato që nuk do të reduktohen me vendim të Këshillit Gjyqësor.
Kjo është kundërpërgjigjja e gjyqësorit ndaj Qeverisë për ulje të pagave, i cili përkrahet edhe nga Këshilli Prokurorial i Kosovës.
Prokuroritë do të punojnë vetëm me kallëzime penale për caktim të masës së paraburgimit, ato të dhunës në familje, sekuestrim të pronave dhe do të përfundojnë aktakuzat që i kanë kryer hetimet.
Por, megjithëse ky vendim hyri në fuqi, nuk u përfill në të gjitha rastet.
Avokati Rudari, përmes këtij vendimi për reduktim të seancave parasheh ndikim tek qytetarët.
Ndërkohë, puna në administratën e gjyqësorit vazhdon me ritëm të njëjtë, e pa ndikuar në vendimet e Këshillave.
Kthim në normalitet, kërkoi ministrja e Drejtësisë, Albulena Haxhiu, duke e arsyetuar uljen e pagave në sistemin e drejtësisë.
Vendimi për ulje të pagave, e befasoi edhe Zyrën e BE-së në Kosovë.
“Jam i befasuar me vendimin e Qeverisë së Kosovës për uljen e ndjeshme të pagave të gjyqtarëve dhe prokurorëve. Financimi adekuat dhe pavarësia e institucioneve gjyqësore janë gurët e themelit të sistemit të sundimit të ligjit dhe kërkesat themelore të procesit të integrimit në BE”, tha ai.
Ndërkohë, LDK-ja, e quajti si goditje të rëndë për drejtësinë.
Kritika për këtë veprim të ekzekutivit kosovar në kuadër të Ligjit për Paga për Sektorin Publik, pati edhe shoqëria civile.
Kronika e realizuar nga Florijeta Dernjani
