Përmes një postimi në Facebook, ai thotë se deri më tash ka pasur “zero transparencë” nga Qeveria për këtë proces.
“Debati formal për dialogun duhet të sillet në Kuvend për të siguruar transparencën për këtë proces të rëndësishëm dhe për të ndërtuar konsensusin politik. Deri tani kemi parë zero transparencë nga Qeveria ndaj Kuvendit të Kosovës, si dhe publikut në përgjithësi, për propozimin franko-gjerman”, shkroi ndër tjerash ai.
Sipas tij, nëse ekzekutivi vlerëson se propozimi është bazë e mirë për të lëvizur drejt normalizimit të marrëdhënieve, do të duhej informuar Kuvendi për konsensus politik dhe shoqëror.
“Nëse Qeveria vlerëson se ky propozim është bazë e mirë për të lëvizur drejt normalizimit të plotë të marrëdhënieve mes dy shteteve dhe njohjes reciproke, do të duhej të informohej Kuvendi dhe publiku në mënyrë që të sigurohej konsensusi politik dhe shoqëror. Për më tepër, informimi i Kuvendit nuk është në diskrecion të Qeverisë, por është obligim kushtetues i Qeverisë ndaj Kuvendit pavarësisht se çfarë mendon Qeveria për këtë propozim”, shtoi ai.
Madje, Hoti tha se është e domosdoshme që të zhvillohet një debat rreth dialogut mes partive politike në Kuvend.
“Është e domosdoshme që debati formal mes forcave politike për dialogun të zhvillohet në Kuvend. Vetëm kështu (1) sigurohet transparenca ndaj publikut, (2) përmbushet obligimi kushtetues për raportim dhe (3) ndërtohet konsensusi politik e shoqëror. Asnjëherë Kosova nuk ka pasur opozitë më mbështetëse për dialogun sesa tani. Kjo rrethanë duhet të shfrytëzohet për të lëvizur përpara”, thuhet ndër tjerash në postim./teve1.info/
