Abazi ka thënë se janë prekur raportet e Kosovës me partnerët, në veçanti me Shtetet e Bashkuara të Amerikës.
Duke ju referuar vendimit për targat, Abazi tha se kjo çështje do të mund të priste deri në momentin e nënshkrimit të një marrëveshjeje në mes të Kosovës dhe Serbisë.
“Largimi i serbëve nga institucionet e Kosovës është karta dhe çelësi për Serbinë për të rrëzuar nivelin e zbatueshmërisë së marrëveshjeve të Berlinit si dhe për të mbajtur minimumin e presionit ndërkombëtarë për mosvendosjen e sanksioneve ndaj Rusisë”, tha Abazi.
Abazi ka thënë se kërkesat e ndërkombëtarëve do të duhej të konsideroheshin si dhe ka përkrahur idenë që Kosova të fillojë konsultat rreth themelimit të Asociacionit të komunave me shumicë serbe.
Duke komentuar çështjen e Asociacionit, Abazi tha se ai nuk duhet të ketë asnjë kompetencë ekzekutive porse meqë ekziston një mendim i Gjykatës Kushtetuese, konforom tij, Kosova duhet të bëjë hapin e parë.
Abazi ka thënë se deri tek ashpërsimi i raporteve të Kosovës a ardhur për shkak të qasjes së gabuar në procesin e dialogut si dhe politikës së jashtme.
“Është urgjente që t’i kthehemi tavolinës së dizajnimit të politikës së jashtme dhe qëndrimeve të analizuara mirë për të rikthyer marrëdhëniet dhe për të arritur objektivat tona në interes të shtetit dhe publikut. ”, tha Abazi.
Abazi tha se qeveria, përfshirë kryeministrin Albin Kurti, kanë refuzuar që ai të ndihmonte në hartimin një strategjie më të fuqishme gjatë vizitës së tij në SHBA, vizitë kjo që u realizua muajin maj.
Mes tjerash Abazi ka kritikuar edhe qasjen e qeverisë në raport me krizën energjetike.
Me 5 nëntor, duke mos u pajtuar me vendimin e qeverisë së Kosovës për largim nga komunikacioni të targave të paligjshme ‘KM’, qytetarët serb të komunave veriore Zveçan, Zubin Potok, Leposaviq dhe Mitrovicë e Veriut, vendosën që të organizuar të largohen nga institucionet përfshirë nivelin qendror, lokal dhe të drejtësisë./rel
