BE-ja ka bërë thirrje që Kosova dhe Serbia ta bëjnë hapin historik për të ecur përpara në normalizimin e marrëdhënieve, duke ju referuar planit franko-gjerman.
Zëdhënësi i BE-së për Punë të Jashtme, Peter Stano ka konfirmuar se kanë marrë tashmë përgjigjet nga Kosova dhe Serbia për planin franko-gjerman dhe të njejtat janë duke studiuar, ndërsa ka bërë thirrje që dy vendet ta shfrytëzojnë këtë mundësi.
“Ne duhet të kapërcejmë gjendjen e përhershme të krizës dhe të ulim tensionet ndërmjet Kosovës dhe Serbisë dhe jemi mirënjohës për mbështetjen e Gjermanisë dhe Francës për këtë propozim. Tashmë kemi marrë përgjigjet nga të dyja palët dhe jemi duke i studiuar. Ne i bëjmë thirrje Kosovës dhe Serbisë që ta shfrytëzojnë këtë mundësi dhe të bëjnë një hap historik përpara në normalizimin e marrëdhënieve të tyre, gjë që është kyçe për të përparuar në rrugën e tyre evropiane”, ka thënë Stano.
Kujtojmë se një takim i mundshëm mes kryeministrit të Kosovës Albin Kurti dhe presidentit Aleksandar Vuçiq mund të ndodhë këtë të enjte në Paris, pasi të dy kanë konfirmuar se do të udhëtojnë për në Francë dhe këtij takimi mund t’i bashkohet presidenti francez Emmanuel Macron.
