Berisha në foltoren e Kuvendit, ka thënë se nuk pranon të jetë pjesë e një debati, kur sipas tij vendi është i shqetësuar për situatën e fundit në veri, raporton Teve1.info
Ai shton se ka paralajmëruar se të gjitha aktivitetet në veri, kanë prapavijë brenda dhe siç thotë ai, po bëhet realitet.
“Që prej se keni hyrë në politikë edhe unë që kam hyrë në politikë, kam paralajmëruar se ju do të jeni ata që keni me na sjell në situatë me e bë jo vetëm asociacionin por edhe shumë do veprime tjera që kanë me falimentu politikisht këtë shtet. Kam paralajmëruar edhe se gjitha këto aktivitete në veri, e kanë një prapavijë brenda, dhe ajo që kam paralajmëruar po bëhet realitet”, ka deklaruar Berisha.
Po ashtu, Berisha thotë se Qeveria po rrëshqet drejt një diçkaje tjetër e që sipas tij është tradhtia ndaj vendit.
“Që nga marrëveshja bazë Rambuje e Vjenë, e të gjitha atyre teknike e deri te këto politike të mbështetura nga faktori ndërkombëtar, tendenca për riformatim më ka fillu me bo me dyshu se ju po rrëshqitni drejt një diçkaje tjetër, e ajo do të jetë tradhtia ndaj vendit tonë”, theksoi ai, teksa kryetari i Kuvendit, Glauk Konjufca iu drejtua duke i thënë se nuk është në temë.
Berisha ia ktheu duke i thënë se është në temë dhe seanca e thirrur për energjinë po fyen intelegjencën e deputetëve dhe popullit të vendit.
“Kryetar, jam në temë dhe mos të iu brengos ky fjalor se në këtë foltore kam dëgjuar fjalor edhe më të rrezikshëm dhe fyes. Nëse doni zë kam më shumë se ju. Do burra që kanë pas vizion me bë Kosovën dhe kanë qenë arkitekt, do burra që kanë vesh uniformën dhe armët e kanë luftuar me bë këtë shtet sot, e ju sot keni thirr një seancë për energjinë dhe po fyeni inteligjencën e gjithë deputetëve dhe popullit të Kosovës”, shtoi ai.
Ai thekson se nuk do të jetë pjesë e seancës, teksa i drejtohet Konjufcës “kryetar hiqma mëditjen lirisht”.
“Nga mbrëmë kur e kam dëgjuar edhe kryeministrin që projekti franko-gjerman është i mirë për Kosovën, jam i bindur se kryeministri po rrëshqet pikërisht aty ku e kam paralajmëruar. Unë nuk pranoj të jem pjesë e një debati të tillë kur vendi është i shqetësuar për atë, se apo dëmtohet integriteti i shtetit dhe apo qohet Kosova drejtë një tradhtie. Shumë shpejt po presë ta bëjë edhe një hap dhe ta merrni emrin e merituar, por mos harroni se ai emër ka edhe çmim tradicional dhe unë kryetar nuk do të jem pjesë e kësaj seance. Hiqma mëditjen lirisht”, përfundoi Berisha. /Teve1.info/
