I ftuar në emisionin “Ditari” në tëvë1, ai thotë se deputetët që kanë dhënë dorëheqje nuk mund të kthehen më në këtë pozitë.
“Kjo të themi duhet që brenda 30 ditësh të zëvendësohen me emra tjerë të Listës Serbe. Kjo procedurë shkon përmes Presidencës duke u dakorduar edhe me KQZ-në ku kandidatët më të votuar të Listës Serbe do të zëvendësohen. Kjo është problematike sepse i kemi parë deklaratat e Listës Serbe dhe nuk dihet se nëse të njëjtit do të kthehen apo jo në Kuvend. Por ajo çka është e qartë është se deputetët aktualë që sot i kanë dorëzuar dorëheqjet nuk mund të rikthehen në pozitat të cilat i kanë pasur në Kuvend sepse Ligji për Zgjedhje parasheh këtë”, tha ai.
Sipas tij, nëse deputetët nuk zëvendësohen atëherë funksioni i legjislativit do të jetë i cunguar dhe se do të jetë një “vakuum kushtetues”.
“Ajo çka është e qartë që nëse deputetët e LS nuk betohen, ata që e kanë rradhën Kuvendi do të ketë 10 deputetë më pak nga vendet e rezervuara të komunitetit joshumicë. Natyrisht se do të shkaktonte një vakum kushtetues në funksionimin e Kuvendit, sepse duke marrë parasysh që shumë raste duhet funksionimi i Kuvendit por edhe ta themi miratimi i ligjeve kërkon 2/3 e deputetëve dhe të pakicës. Prandaj, funksionimi do të ishe i cunguar që mos të themi që nuk funksionon fare por do të kishim probleme në disa aspekte”, tha ai.
Po ashtu, Makshana përmend edhe zgjedhjet qendrore si opsion i fundit për të dalë nga kjo situatë e krijuar në Kuvend.
“Ndoshta nuk janë zgjedhja e vetme por zgjidhja e fundit zgjedhjet si alternativë për shkak se nëse marrim parasysh që duhet të procedohen tutje shumë procese atëherë prezenca e Listës Serbe, deputetëve serbë është shumë e nevojshme sepse nuk mund t’i shtyjmë përpara disa procese që janë të ndërlidhura edhe me pakicat”, shtoi ai./teve1.info/
