Kryeministri Albin Kurti ka thënë se në takimin e Brukselit, në agjendë kishte dy pika.
“Formalizimin e pranimit të marrëveshjes bazë dhe e dyta fillimin e diskutimit të planit të zbatimit të kësaj marrëveshjeje. Shpeshherë ka një keëkuptim, BE e ka propozuar vetëm marrëveshjen, plani i zbatimit duhet të negociohet”, ka thënë Kurti.
Ai shtoi se marrëveshja u refuzua kategorikisht nga Vuçiqi çka sipas tij do të thotë se Serbia nuk pajtohet me përmbajtjen.
“Unë në takimin trilateral i ofrova nënshkrimin për marrëveshjen bazike, që do të duhej ta nënshkruanin edhe Borrelli edhe Vuçiqi. Ajo u refuzua menjëherë, në mënyrë kategorike presidenti i Serbisë. Qëndrimi i Borrellit është që ky dokument nuk do të ndryshohet me dhe ai tanimë është publikuar. Kjo nuk nënkupton që palët e kanë pranuar zyrtarisht marrëveshjen. Ajo bëhet përmes nënshkrimit të marrëveshjes. Refuzimi i Serbisë nënkupton që ata nuk pajtohen me përmbajtjen”, deklaroi Kurti.
“Marrëveshja bazohet në parimin e barazisë së sovranit, heqjen dorë nga pengesat për anëtarësim në organizata ndërkombëtare, misione diplomatike në nivel ambasadorësh. Mundëson një projekt paqeje që e shndërron në obligim ligjor arritjen e një marrëveshjeje finale”.
Kurti në Kuvend tha se problem i vetëm i këtij propozimi është neni 10 ndërsa ka shtuar se do të bëjë përpjekje maksimale t’i reduktojë gabimet e qeverive të kaluara dhe t’i zbatojë marrëveshjet për të cilat ka autorizim kushtetues.
“Ka edhe shumë keqkuptime dhe informacione të pavaërteta. Premisa ime bazë si kryeministër shtë që nuk do të lejoj të negocioj asgjë që nuk është në përputhje me Kushtetutën apo diçka që synon territorializimin, monoetnicitetin apo krijimin e urave për ndërhyrje të Serbisë në punët e brendshme të Kosvoës. Asnjë nga kjo asnjëherë. Gabimet e qeverive të kaluara nuk do të përsëriten asnjëherë. Do të bëj përpjekje maksimale që gabime politike e historike të qeverive të kaluara ato t’i eliminoj apo t’i reduktoj substancialisht të mos jenë pengesë për karakterin demokratik e unitar të Republikës sonë”.
“I vetmi nen ku ka problem është ajo që lidhet me obligimet e trashëguara e që ka një konsensu ndërkombëtar që ajo duhet zbatuar. Ajo është neni 10 që përmban normën që të gjitha marrëveshjet e Brukselit duhet zbatuar. Këtë duhet ta kuptoni si detyrim ndaj tërësisë e jo si diçka të veçantë ndaj një elementi të një marrëveshje, pra e kam fjalën për atë të 2013. Marrëveshja bazë nuk i veçon elementet. Unë e kam pranuar që ekziston një thes me marrëveshje dhe për t’i zbatuar duhet të sigurohemi që do ta zbatohen sipas rrjedhës së tyre kohore dhe vetëm për ato që ka autorizim kushtetues në Republikën tonë për t’i zbatuar. Prandaj lexojeni fjalinë deri në fund sepse nuk thotë që vetëm duhet të zbatohen”.
“Nëse më pyesni a duhen zbatuar ato që i tërë komuniteti ndërkombëtar pret që duhet zbatuar, përgjigja ime është po por vetëm nëse zbatohen të gjitha në përputhje me ligjet, duke respektuar drejtësinë dhe barazinë. Nuk lejoj veçime apo fokusime në një”, shtoi Kurti